بيز اوستون گلميشيك هر سيتمگره،

پروانه نين سرگذشتي

افسانه دي شمشيره دايانمازسا، آزادليق

سن اوسان منده بویام

بيز اوستون گلميشيك هر سيتمگره،
آرخادا اوْلموشوق ا‌زيلنلره،
حتي باج وئرمه‌ديك بيز ايسكندره،
سود وئريب ارشكه، اشكانا خلقيم.
بيز قوودوق ايراندان يادي ، يوناني،
قورتارديق ظولمدن فارسي، كيرماني،
خلقيمين تاريخده وار آدي، ساني،
دئييلدير قورو، بوش افسانا خلقيم.
عرب بو توپراغا چكنده شمشير،
اوْنون شمشيريني قيردي جوانشير،
بابكين نعره‌سي هله‌ده ياشير،
قالاسين ساخلايير آلانا خلقيم.
عربين بو يئردن ظولمونو قازان،
مگر اولماميشدير آلپ‌ارسلان؟!
قورويوب بو يئرين ، بلي هر زامان،
شرافتين مرد ـ مردانا خلقيم.
اوندا كي يو‌خ ايدي ايراندان نيشان،
قيزيلباش ائيله‌دي ايراني ايران،
ايرانا باش اوْ‌لدو آذربايجان،
سالدي ايشلريني سهمانا خلقيم.
مشروطه زاماني اولو ستارخان
ايستيبداد دئوينه توتاراق ديوان،
آزادليق پري  سين گتدي ارمغان،
توْي توتدو سولطانا ، خاقانا خلقيم.
هله ده اوْلوبدور ديللر ازبري،
قوْچاق موجاهيدين ايگيدليكلري،
بيزيمدير اونلارين بؤيوك هونري،
اؤيونور سالارا، باغبانا خلقيم.
جسارت كانييدي خيابانيميز،
اونونلا ديريلدي بو ايرانيميز ،
او بيزيم فخريميز، حيكمت كانيميز،
سؤزلرين ساييري دوردانا خلقيم.
شئخ ممد سوسمايان آلوولو سسدير.
ميلي وارليغيما او تكجه بسدير،
تاريخه هاي سالان گوٍجلو جرسدير،
اؤيونور بئله ‌بير اينسانا خلقيم.
ايل كئچر ، بير ميلت بير اينسان دوغار
اوْنون تدبيريله  دوشمانين بوغار،
داهيلر توپلانار ، خلقه گوٍن دوغار،
چو‌خ وئريب دهيلر ايرانا خلقيم.

یازان:  محمد تقي زهتابي

پروانه نين سرگذشتي

سئودا گولونون رايحه سين تازه جه قانميش
گول- گول قاناديندان آزاجيق شعله ده يانميش
پروانه ني گوردوم.
سرميشديسه يانميش قانادين تورپاغا يورغون
دوشموشدوسه ديلدن، گئنه ده آتشه وورغون
باخماقداايدي حيرصيله، اولدوز كيمي، گوزلر
اوددان نه گوروبسن، آ زاواللي؟ - دئيه، بير آن
توتدوم قاناديندان.
ساپديرماياراق گوزلريني بير دم آلوودان:
- بيگانه سن، اي – سويله دي- افسانه لريمدن
قالديرديغيم اولده كي پئيمانه لريمدن
احواليمي بيلسه ايدين ازلدن گر آديمدان
توتمازدي الين ايندي بو يانميش قاناديمدان
- عاشيق تانيميشدير- دئديم- آنجاق سني دونيا
ائتمز سن، آديندان گورونور، دهرده پروا
اوددان و آلوودان.
اما دئه گوره ك حاليوي، افسانه وي بير- بير
قصدين نه دي يانماقدان اود ايچره، اونو بيلدير؟
- من سويله رم اما- دئدي- ال چك قاناديمدان
لاييق دئييل آزاد اولان انسانلارا زندان:
" دايم مني اوخشاردي آنام كورپه اوشاقكن.
تك لايلاريندان بونو خاطيرلاييرام من:
"آتشله يارانديق!"
اورتردي عصيرلرجه يئري قاپ- قارا پرده
مطلق او قارانليقلاري يلدا گئجه لرده
شيمشكلر عجايب سسيله گورلاييب، هردن
اوز اودلو قيلينجيله بير آنليقجا ياراركن:
- باخ، گور، بودور آتش- دئيه، سويله ردي آنام، من
فيكره داليب، آتش دئيه، قاچماق دوشونركن
اوخشاردي و سويله ردي منه قايغيلي گوزله:
تئزدير، هله گوزله!!
آخشام چاغي بيرگون بوتون عالم قارالاندا
ظلمت قوشو هر بير طرفه كولگه سالاندا
خلوتده آنام سويله دي:
- دولدون ياشا آرتيق،
كئچميشدير او گونلر، بالا، كئچميشدير اوشاقليق
عقلين كسير آرتيق، قولاغ آس سويله ييم ايندي
قلبيمده كي سيرري:
" بير آخشام آتان، گوستره رك شمعي اوزاقدان،
- هر وقت- دئدي- كورپم اولار بير ايگيت آسلان،
سويله، اوسانيب تنگه گتيرسه اونو ظلمت
بيلمه ك ديله ييب سورساكي، بس هاردا حقيقت؟
قوي گئتسين اورا، اوردا حقيقت نه دير آنلار
گر بير آتا تك اوندا منيم حق- سعييم وار
گئتسين كي، يئتر نسله بو گئتمكله شرافت
كئچميش بابالاردان منه چاتميش بو وصيت…
قورتارجاق آتان اوددو اونو قاپ- قارا پرده،
دونمه دي بيرده.
دوزدور بالا اونلار، دئميره م بير داها تكرار
كئچميش آنالاردان منه قالميشدير اينان بو
حق يول بو، حقيقت بو دور، اسرار جهان بو…
ظلمتده بونو سويله يه رك ، ايتدي بير آندا
گئتدي آنام دا…
×××××
گون كئچدي، زامان كئچدي، قارانليغدان اوسانديم
شيمشك چاخان آن ياتميش ايديم سانكي، اويانديم
آخشام چاغي، ائتجه ك بالاما من ده وصيت
آتش دئيه گئتديم.
تاپديم من اوز آختارديغيمي اوردا نهايت
هر بير شئي اينان: شعله، ايشيق، نور، حرارت…
- بيلديم، دئه- سوآل ائيله يه رك، بيرده دايانديم:
- قاندين مي حقيقت نه دير آخير؟
- بلي قانديم.
لاكين او زامان سيرريني آنجاق اونون آنديم
كيم اودا يانديم.
چونكي قاناديم اوددا يانان دمده، بير آنليق
گوردوم نئجه محو اولدو ايشيقلاردا قارانليق!!
- يانماقدادا، بيچاره – دئديم- وارمي حقيقت؟
- يانماقدا حقيقت سنه افسانه دير البت،
اما منه يوخ، چونكي، قارانليقدان اوسانديم
اودسوز عومورون قلبه ماحال اولدوغون آنديم،
آتش دئيه گئتديم و نهايت اودا چاتديم
ظلمت تورونو نورايله بير لحظه ده آتديم
بير دمده ايشيقلاندي باشيم دا، بدنيم ده...
فيكريمده ن اوزاقلاشمادي اما وطنيمده
ظلمتلره قلبيمده درين نفرت اوياندي
فيكريم او قارانليقلاري بوغماقدا داياندي
جومدوم اودا، آچديم قولومو اودلو هوسله
تا بير قوجاق آتش گتيريم يوردوما تحفه
رحم ائتمه ييب عصيان آلوو جسميمي ياخدي
شر قووه لر آت چاپدي قانيم سئل كيمي آخدي
يانماقدادا، عشقيم كيمي، ديلده ن- ديله دوشدوم
قان دالغاسي آتدي بو آزاد ساحيله دوشدوم...
ال چك قاناديمدان، گوروسن بيتدي حكايت.
- الدن سني سالميش بو آغير گون، بو فلاكت
مرهم قويارام، دوز بوگونو – سويله ديم آرام-
قورتارمادي گون، وار يئنه ده آيري بير آخشام.
- يوخ، يوخ- دئدي- سن آنلامادين قلبيمي، هئيهات!
هر عصره ياراشماز نه او مجنون، نه او فرهاد
هر بير گونون اوز حوكمو، اوز افسانه سي واردير
هر آيري اودون، آيري دا پروانه سي واردير
هر بولبول ايله بير گول آچير عشق باغيندا
هر قيز گلين اولمازمي مگر اوز اوتاغيندا؟
آچميش بو گولون ده دلي- ديوانه سي يم من
ايندي بو اودون، قان بونو، پروانه سي يم من
ال چك قاناديمدان!!
ال چك كي، دوغولموشكن اوزوم فيرتينالاردان
ساكت باخا بيلمه م دلي عمانا كناردان
هر دالغاسي بير عومره برابر هيجاندير
هر نعره سي خلق عاشيقينه بير تازا جاندير...
باخ كوكره ين عمان نه دئيير اودلو سسينده
مين نغمه سي، مين آتشي وار هر نفسينده
من گرمه لي يم سينه او چيلغين لپه لرده
گول- گول قاناديمدان گره ك اونلار اوپه لرده
چارپيشماسا قول اوردا، پولاد تك سوواريلماز
شيمشك كيمي قول اولماسا، ظلمت كي ياريلماز
- اوددور او، ياخيب وارليغيوي يانديراجاق دير!
- يانديرماغينا جاهيل اونون كورپه اوشاقدير.
اوددا ياناراق، ظلمتي بوغماق ديله رم من
آل شعله اولوب، عرشه اوجالماق ديله رم من.
اوددان و آلوودان دوغولوبسوز اوزونوزده
واردير هله ده اودلو قيغيلجيم گوزونوزده
اوددان بو ساغينديرمازا بيلمه م نه سبب وار؟
- آلقيشلاميش آتشلري پئيوسته ازلدن
اوددان دوغولانلار.
آلقيش دئييرم من ده او وولقانلارا قلبا
وولقان گوجونه قورموش اليم گوللو گولوستان
قوي سن كيمي اود ياورولاري فيض آلا اوندان
- قورموشدور الين بير تازا گولزار ، بو دوزگون
غواص تك اونلار كي، و لاكين دور آرارلار
گولشن دئييل، سهو ائتمه سم، عمانه وارارلار!!
- بير آرزو دور هر شخصه حياتين دادين آلماق
- لذت! نه گوزه ل سوز! بونا شك ائتميره م ، آنجاق
فرض ائت بورادا خيضر قدر اولدو حياتيم
هر فيرتينادان، فرض ائيله يك، اولدو نجاتيم
عومروم كئچه جكدير، توتاليم، هر يئني گونده
مين تويدا، دويونده...
آخير مني بير گون اوداجاقدير قارا تورپاق
بس اوندا وطن قلبينه باتميش قارا جايناق؟!
بس وارليغيمين، منليگيمين خاليقي ائللر؟!
بس گنج اولاراق چيمديگيم افسانه لي گوللر؟!
روحون، كونولون، حسلرين دايه سي گوللر؟!
بس اوندا سويون ايچديگيم او گوزگو بولاقلار؟!
پئيوسته بولودلا اوپوشن نازلي او داغلار؟!‍‍‍‍‍‍
يوز بار وئره ن هر شاخه ده جنت كيمي باغلار؟!
چوللر‍،دره لر،يام- ياشيل اطلسلي ياماجلار؟
قاققيلداشاراق گويده سوزه ن نازلي توراجلار؟
آزادليق اوچون چارپيشان ائل؟ قان توكه ن انسان؟!
ترك ائتديگيم آل قانا بويانميش اولو مئيدان؟!
زحمت آناسيندان مدنيت دوغورانلار؟!
بس وارليغيمي قانلي ترايله يوغورانلار؟
بس اوندا حالال سود كي،اوشاقليقدا دوشونده ن
امديم آنامين من؟!
بس بونلارا بورجوم؟!
بس اوندا وصيت؟ اونودولسون مو وصيت؟!
ترك ائتسه م اگر،مين كره نفرت منه نفرت
يوخ،يوخ،منه گولزاردا پئيمانه گركمز
شهلا، جان آلان نرگس مستانه گركمز
دلبر دوداغيندان امره ك مست اولوب اولمه ك
من ايسته مم، آللاهي سئورسن، بوراخ، ال چك
دايم تازاليقلار  گونونون ايلك ايشيغيندا
چيممه ك و ايسينمه ك ديله ين تشنه بو كونلوم
ائل آرزوسو عمانيني بير دمده، بير آندا
كوثر دئيه، ساغر كيمي، ايچمه ك ديله يير، قان!
ال چك قاناديمدان!!

یازان:  محمد تقي زهتابي

يازينين آدي: افسانه دي شمشيره دايانمازسا، آزادليق

چكديكده قيلينجين،
جوشدوقدا دنيز تك،
توفان كيمي اورمانلاري تيترتديگي آنلار
دوشمن كيريييب آغلادي مسكين.
باش ايدي غلام تك اونا سلطانلار، اوزانلار،
زحمت چكن انسانا اؤلوم حؤكمو يازانلار،
مللتلرين ديللرينه قبر قازانلار...

قؤيدوقدا قينا اودلو قيلينجين،
سونبوللري بيچديكده يايين ايستي چاغيندا،
دوشمن دونه رك آسلانا گلدي،
سونگو يله اونون زحمتينين ياريسين آلدي،
آج قالدي قيشين شاختالي، چووغونلو چاغيندا،
بير سؤز دئمه دي سينه سي ميس تك يانان
      / آسلان
      / كيمي انسان!!
سونگويله بوتون ثروتيني چالدي، آپاردي،
زنداندا چوروتدو
آسلانلاري بير- بير،
حؤكمون ده يوروتدو،
بئينين ده قازيب اينجي قوپارتدي،
تاريخيني آلت- اوست ائله ييب يازدي تازاشدان؛
بير آبيده ده تيكمك اوچون وئرمه دي ايمكان؛
اولكيلري ائيله دي ويران...
دؤزدو گئنه ده سينه سي ميس تك يانان
       / آسلان
       / كيمي انسان!!
قلبينده سه عصيان.

بير گون ده گليب ايسته دي توپراقدان
       / آييرسين اونو دوشمان
بير فيكره داليب سوسدو بو آسلان
       / كيمي انسان
       / و دوشوندو:
آرخامدي بو توپراق،
شنليكده بوساطيم دؤشنن يئر،
پيس گونده داياق،
       / همده سيغينجاق
توپراق
/ اگر اولمازسا نه ييم وار و نه يم من؟
توفانلي دنيزلرده اوز ه ن بير اؤلو يارپاق!
مين بير اولو بابك كيمي اجدادلاريم آنجاق
بوردا ياشاييب، عؤمر سوروب، گؤمدورولوبلر
چيخسام وطنيمدن،
هاردان آلارام قان،
هاردان گله جك جسميمه قووت،
       / و جسارت
       / و همييت؟
هاردا قازيلار سون بئشيگيم بس؟
كولي دئير اولاديما هر كس...
نفرت دولو گوزله
بير دوشمني سوزدو،
((هئركول)) كيمي جانلاندي گؤزونده
ايستير آياغين يئردن اوزوب آنتئيي بوغسون...
داغلار گوجو حيس ائتدي اؤزونده،
قلبينده قاني كوكره دي، جوشدو،
قيزغين شئره دؤندو
سانكي بو سفر سينه سي ميس تك يانان
        / آسلان
         / كيمي انسان!!
آيدينجا گؤزونده آليشان شعله گؤروندو؛
كين اؤرتوگونه سانكي بوتون وارليغي بير آندا بوروندو.
سيخدي كوره گين توپراغا دوشمنله ديديشدي.
قوپمام- دئدي- اؤلسم ده بو يئردن،
           / بو دياردان.
كئچميش بابالاردان
           / آتالاردان
ارثيمدي بو داغلار،
بو بولاقلار،
بو اتكلر،
بو چيچكلر...
اوولاديما ارثيم گرك اولسون بو دياريم.
توپراقدي منيم دارو نداريم.
داغلارجا فلاكت،
عمانجادا موحنت
و اذيت
بير دمده بئله آغناسا گر اوستومه قوپمام...
آز قالدي جوشا سينه سي ميس تك يانان
        / آسلان
        / كيمي انسان!!
قلبينده يامان چاغلادي عصيان
توفانلي دنيز تك!!

كئچميشلري خاطيرلادي دوشمن،
بير واخلاري كي، سينه سي ميس تك يانان
      / آسلان
      / كيمي انسان.
چكميشدي قيلينجين...
- قوي جوشماسين عمان-
       / دئيه، قلبينده جه آرام،
دوشمن گئري دؤندو...

اولدو سحر، آخشام،
كئچدي نئچه ايام،
/ قوجامان سينه سي ميس تك يانانين آتشي سؤندو
سؤندو گئنه گؤزلرده قيغيلجيم
/ و دورولدو
گؤزلر كيمي هر ياندا بولاقلار
  / و ايشيقلاندي چيراقلار؛
سونبوللري ده بيچدي اوراقلار؛
قيشلار دولانيب، كئچدي سازاقلار؛
بير آزجا گولوش  گؤردو دوداقلار؛
دينجلدي آياقلار
/ و باجاقلار،
هر ياندا بوساطين دؤشه دي دوزلره يازلار،
آذر گوزلين چؤلغادي نازلار،
ديللندي ياماجلاردا يئنه نغمه لي سازلار،
عزيزيم گولوم واردير،
وفالي ائليم واردير،
وطنيم تالانديسا،
وارليغيم، ديليم واردير...

توتدو گؤزونو اويغو ايلان چالميشين، آمما
بير آن دا بئله ياتمادي دوشمن.
هر گون يئني بير حيله دوشوندو،
هر ايل يئني بير دوندا گؤروندو،
عاريفلريني توپلاياراق، قوردو ييغينجاق،
تا بلكه تاپا مينمه گه بير تازا اويونجاق.
سون تدبيري ساده:
لازيمدي ده گيشسين
زحمتله بوتون وارليغي يوغرولموش اولان،
   / سينه سي ميس تك يانانين اؤزلوگو آنجاق.
گر اؤزلوگون آلساق،
گر منليگيني، كيمليگيني آلساق اليندن،
توپراق دا بيزيم دير،
داغ، دوز، دره، اوتلاق دا بيزيم دير،
تكجه نه كي نعمت، نه كي معدن،
نعمت يارادان قول، قولوموزدور؛
آلساق ديليني، اؤزلوگو يوخ بير قولوموزدور...

دوشمن ياساق ائتدي، وئره رك بير اولو فرمان
زحمتله سعادت آرايان،
    / سينه سي ميس تك ياناني دوغما ديليندن.
انسانليغي لذتله قارين، پولدا بيلنلر،
قارين ايزي ايله سورولر تك سوروننلر،
معنادا دئييل، ظاهيرأ اينسان گوروننلر،
اؤز وارليغين افسانه سايانلار،
اينسان كيمي لر بال كيمي شيرين ديلين آتدي؛
نعمتلره،
  / لذتلره،
   / شهرتلره،
    / چاتدي.
انسانليغيني بير قارينا، بير پولا ساتدي.
آيريلدي ديليندن،
آيريلدي ائليندن.
كئچميش كيمي لاكين قوجامان
    / سينه سي ميس تك يانان
     / آسلان،
دايم باخاراق غملي گئدنلر داليسينجا،
انسانليغي، مليتي جوشدو،
قلبينده قاني جوشدو و داشدي،
جسمينده گوجو حديني آشدي،
ووردو بئلي قووتله بير آرشين يئره كئچدي،
خوشبخت ليگين تاپدي يئريندن
   / و تريندن.
يئللر پوزا بيلمز قوجامان داغلارين
   / آيديندي ووقارين.
قانون طبيعتدي درين كؤكلو چينارلار،
يارپاقلاريني توكسه ده توفاندا، سازاقدا،
آزاد گونشه دوغرو دمادم بوي آتارلار،
مؤحكمدي كؤكو چون آنا توپراقدا،
   / بولاقدا،
اؤلموش قورو يارپاقلاري
   / سالماز چيناري
   / ذره جه اولسا ووقاردان، عظمتدن!!
سرسم يئله اويموش
يارپاقلارين آمما،
يئللر گومورر هر بيرين آخير
بير گوشه ده، بير قبرده ايتگين.

بئش ياپراغيله اؤزلوك آلينماز،
قيرخيلسا توك، اينسان كيشيليكدن كي سالينماز،
لازيمدي دگيشسين ديلي بو سينه سي ميس تك يانانين
سون امريني دوشمن بئله وئردي.

دوشمن گله رك سؤيله دي:
آت دوغما ديلين بير كره، حتي
آت اسكس شعورون
   / و دوشون تكجه منيم تك.
سن
   / منسن
     / ازلدن.
مجبور ائله ييبلر كي، اوزاقلاشميسان اؤز دوغما ديليندن.
بيگانه ديلين بوشلا سن، ال چك...
فيكره دالاراق سوسدو بير آن
    / سينه سي ميس تك يانان
     / آسلان
      / كيمي انسان!!
مومكون دو مگر آيريليم اؤز دؤغما ديليمدن؟  
مومكونسه ده، آخير نه سببدن؟
ديلدير مني آنجاق ائله ين
    / من!!
اؤزگه كيمي، بيلمم، نئجه مومكوندو دوشونمك؟
مومكونمو قارانليق اولا شيمشك؟!
مومكوندو مگر ((آب)) دئييم من سو يو گورجك؟!
ائتميش، دئمه لي، اؤزلوگومو، وارليغيمي ايندي نيشانه.
قويمام آتا، قويموشسادا دوشمن بو اوخون ايندي كامانه.
ساكيت دنيزي چالخادي توفان.
هر مؤحنته دؤزموش قوجامان
     / سينه سي ميس تك يانان
      / آسلان
       / كيمي انسان!!
يوخ، يوخ- دئيه رك، چكدي قيلينجين
ديل؟؟!!
   / شوخلوق بو دئييل، بيل.
شمشيرلره چئوريلدي اوراقلار،
عمان كيمي چالخاندي ياخينلار و اوزاقلار،
سرنيزه يه دؤندو گوزل اللرده داراقلار...
دوشمن كيرييب آغلادي مسكين؛
آيريلدي خيالدان،
بير امر- ماحالدان،
هم بيلدي كي، اولماز بير ائلين
   / اؤزلوگونو آلماق اليندن.
اولماز كي، آييرماق بير ائلي دوغما ديليندن.

بير گون دئدي اوولادينا ياي فصلي بيچينده:
كئچميش بوتون عؤمروم تر ايچينده؛
من قويماميشام يوغرولا بير گون خميريم اؤزگه تريندن،
اولسون گؤزوز آنجاق ايشينيزده، قولونوزدا،
مؤحكم دايانين اؤز يولونوزدا...
آرديندا و لاكين، امه گين اولماسا شمشير،
هر گون چؤره گه دامجيلايار قان.
هر گون گؤره جكدير شرفيز بير يئني تحقير،
هر گون چكه جكدير باشينيز بير يئني ذلت،
تحقير ائده جك ساغ، ووراجاق سؤل سيزه تهمت،
يوردوز اولاجاق دوغما اؤز اولاديزا غربت،
هر كس سيزه ايستر اولا سلطان،
    / آغا، سرور،
دايم آج اولار قارنيز، اليز لئيك خميرده،
شنليك بينالي آتلي اولار، خلق پياده،
ياس حالي اولار ائلده سراسر،
غربتده و دوستاقدا حياتين چورودو مرد اوغوللار،
وئرمز اولارا ياد گوجو مئيدان،
قولدورلارين آغزيندا اولار
آزادليغيز، حقيز،
تحقير اولار هر گوشه ده، هر وقتده انسان،
بيگانه لر اوينار ديلينيز، وارليغينيزلا،
سرمستليگيز، شادليغينيزلا،
اولماز آدينيز دونيادا ميللتلر ايچينده،
شهرتليز ايتر همشه شهرتلر ايچينده،
قلبيز كيمي ويرانه قالار دوغما دياريز،
يول گئتسه ده ائل، كؤلگه كيمين قويماياجاق ايز،
قارين سوراغيله سورولر تك گئده جكسيز.

اللرده اوراقلار
بير آغزي قيلينج اولسا و لاكين،
دوشمن ده سيزه دوست اولاجاقدير،
هر كس ائده جكدير سيزه حؤرمت،
ائللر سيزي اينسان ساياجاقلار،
چون قايدادي شمشيره دايانميشدير عدالت
     / و شرافت.
يوردوزلا برابر
آزادليغيز، حقيز اولاجاق اؤز الينيزده،
تحقير اوزو گؤرمز ائلينيزده،
     / ديلينيزده.
دونيا تانييار سيزلري ملت،
ائللر ائله ير ملته حؤرمت.
حقين قيلينجي وارسا اگر حق تانييارلار.
قدرتلي و آماده گر اولسان،
دايم سني اينسان سانايارلار،
هئچ كيمسه ده جرات اولا بيلمز
      / آغاليق فيكرينه دوشسون
       / سنه بير آن!!
بلي، بالالار، قوي قالا دايم قولاغيزدا
ايش وقتي ده شمشيرينيز اولسون قوجاغيزدا
افسانه دي شمشيره دايانمازسا آزادليق!!...
هئچ وقت قينا قؤيما قيلينجين!

یازان:  محمد تقي زهتابي

قایناخ: گجیل

سن اوسان منده بویام

سو دئییبدیر مــــــنه اولده آنـــــــــام آب کـــــی ،یـوخ

یوخو اوئرتدی اوشاقلیقدا منه خواب کی يوخ   

ایلــک دفعه کی چؤره ک وردی منـه نان دئــــمه دی

ازلینــــدن منه دوزدانه، نمکـــــدان دئمــه دی

آنام اختــــــــــــر دئمییبدیر منه،اولــــدوز دئــــییب اؤ

سو دوناندا دئمییب یخدی بالا،بوز دئییـــــب او

قار دئییب،برف دئمییب،دست دئمیــــیب ال دئییب او

مـنه هئچ وقت بیا سؤیله مه ییب گل دئییب او

یاخشی خاطیرلاییرام یاز گونو،آخشـــام چاغیــــــلار

باغچانین گــــون چیغانیندا کی ایلق گون یاییلار

گه ل- دئییردی-داری ییم باشیوی ای نازلـــی بـــــالام

گلمه سن گر باجیوین آستاجا زولـــفون دارارام

او دئـــــمزدی کـــی،بیا شـــــــانه زنم بر ســــــر تو

گــــر نیائی بــــزنم شـــــانــــــه سر خواهر تو

بلی!داش یاغسادا گؤیدن سن اوسان منده بویـــــام

وار سنین باشقا آنان،واردی منیم باشـــــقا آتام

اؤزومه مخصوص اولان باشـقا ائلیم واردی منیـــــم

ائلیمه مخصوص اولان باشقا دیلیم واردی منیم

ایسته سن قارداش اولاق،بیر یاشییاق،بیرلیک ائده ک

وئرگینن قول-قولا بوندان سورا بیر یولدا گئده ک

اولا" اؤزگــــــــه کــولکلرله گـــــرک اسمیه ســــن

ثــــانـــیا" وارلیقیما،خلقیمه خور باخمـــــییاسان

یوخسا گر زور دییه سن میلتیمی خــــوار ائده سن

گون گلر صفحه چؤنر،مجبور اولارسان گئده سـن

پروفسور دوکتور محمد تقی زهتابی