چیخار تاختا، دیوان ائیلر،

اصلی، قاشلارین، گؤزلرین.

گؤزومدن قان روان ائیلر،

اصلی، قاشلارین، گؤزلرین.

شاه گیمی مطلب بیتیرر

حؤکمون یئرینه یئتیرر،

دیلسیزی دیله گتیرر،

اصلی، قاشلارین، گؤزلرین.

فیرقتین منی یاندیرار،

داغی، داشی دولاندیرار.

قاپی-قاپی دیلندیرر،

اصلی، قاشلارین، گؤزلرین.

هاوادا شاهینه بنزر

یئرده کیلاچینا بنزر،

گؤیده گؤیرچینه بنزر،

اصلی، قاشلارین، گؤزلرین.

گاه آغلادار، گاه گولدورر،

گاه گؤزللیگین بیلدیرر؛

اخیر کرمی اؤلدورر،

اصلی، داشلارین، گؤزلرین.

سؤز تاماما یئتدی. هامی کرمین بو خوش آوازینا احسن سؤیله دی. بیر نفر کرمه دئدی:

- ائی آشیق، گل قال بیزیم ائلده، آشیقلیق ائله، ائو-ائشیک صاحیبی اول. بیزیم ائللر قریب سئوندی. کرم بئله ائشیدنده دئدی: - آغالار، قولاق آسین، بیر قاتار دا سؤزوم وار، دئییم. دئدیلر:

- بویور! کرم دئدی:

تک بیرجه یاریمی منه وئرسه لر، بو فانی دونیادا مالی نئیلرم؟ بیر ایمداد اولورسا مؤولادان اولسون، غئیری نین وئردیگی مالی نئیلرم؟

اوجا داغ باشیندا ترلانلار سوزر، گؤللرده یاشیلباش زونالار اوزر، اصلینین یاناغین بیر سوت خال بزر، غئیری نین وئردیگی خالی نئیلرم؟

کرم دئیر: من نه ایدیم، نه اولدوم. اصلیمین عشقیندن سارالدیم، سولدوم، سیسمیم توک گتیردی، مسنونا دؤندوم، اصلیسیز من ساه-سلالی نئیلرم؟

سؤز تامام اولدو. کرمین دئدیگیننن مجلیس اهلی بیر شئی باشا دوشمه دی. صوفی ایشی بئله گؤرنده دئدی: - قارداشلار، بو ضیاد خانین اوغلودو. اؤز وزیرلری قارا کئشیشین قیزینا آشیق اولوب. قیز دا بونا آشیقدی. کئشیش قیزینی بونا وئرمک ایستمه ییب، گؤتوروب قاچیب. بیزه دئدیلر کی، کئشیش بورادا اولور. بیز ده بورایا گلمیشیک. کرم ائله بیلدی کی، توی اونون سؤوگولوسونون تویودو. تویبگی دئدی:

- آشیق، بو باشقا آدامین تویودو. سنین آختاردیغین کئشیش دونن بورادان کئچیب گئتدی. کرمله صوفی گئجه نی بورادا قالیب، سحر تئزدن دوروب یولا دوشدولر. اونلار گئتمکده اولسونلار، بو طرفدن گؤیده بیر قاتار دورنا گؤروندو. کرم آلدی سازینی، گؤرک دورنالارا نه دئدی:

دورنا، گئدرسیز هارایا، مننن یارا سالام دئیین! گؤرسز اگر بوتام آغلار، دؤنوب یارا سالام دئیین! یولونوز گئدیر آغداشا، قارلی داغلار آشا-آشا، هم قوهوما، هم قارداشا، هم دییارا سالام دئیین! دورنا، تئلین شانا-شانا، هم او یانا، هم بو یانا؛ الین سیزه بیر نیشانا وئریم، یارا سالام دئیین! داد سئیراغیبین الیننن، اشیق داغلارین بئلیننن، دردلی کرمین دیلیننن، دورنام، یارا سالام دئیین! کرم سؤزونو موختصر ائیله دی، یولا داعوام ائله دیلر. بیر مودت یول گئدیب، بیر اوبایا چاتدیلار. کرم اوبانین کناریندا بیر گؤزل قیز گؤردو. بو قیز او قدر گؤزل ایدی کی، گون کیمی هر طرفه ایشیق سالیردی. قیز کئچیب گئتدی. بیر دسته آهیل-ساهیل کرمین اطرافینا توپلاندی. کرم سازی سینه سینه باسیب دئدی: سیزین ائلده من بیر گؤزل گؤرموشم، یوخو دوشوب گورجوستانین ائلینه.

 بولبول کیمی شیرین-شیرین دانیشیر، بال تؤکولور دهانیندان دیلینه. قدیر مؤولام وئریب خوب سامالینی، اونو سئون نئینر دونیا مالینی، قورشاییب کمرله اینجه بئلینی، بویو بنزر اوسا سروین دالینا. کرم دئیر منیم یاریم اینجه دی، دوداقلاری یاری آچمیش قونچادی، سونبول تئلی توپوغوندان اوجادی، بیر تئلین وئرمرم دونیا مالینا. اینجیدی، میرواری، صدف دیشلری؛ قودرتدن چکیلیب کامان قاشلاری، دال گردنده قولاج-قولاج ساچلاری سارماشیر، دولانیر اینجه بئلینه. من کرمم، گئجه قیللام زاریمی، حاق جانیم آلماسین، چکیم چؤرینی، یوخاریدان خبر آلدیم یاریمی، دئدیلر کؤچوبدو بایان ائلینه. کرم سؤزو تامام ائله دی. صوفی آداملاردان کئشیشی خبر آلدی. جاوانلار کئشیشین قارصا گئتدیگینی اونا خبر وئردیلر. کرم یولا روان اولوب، قارصا طرف گئتمگین بیناسینی قویدو. یولدا یئنه-گؤردولر بیر قاتار دا دورنا گئدیر. کرم صوفییه دئدی: - صوفی له له، قوی بو دورنالاردان دا بیر سؤز سوروشوم. الدی کرم، گؤرک دورنالارا نه دئدی: گؤی اوزونده بؤلوک-بؤلوک دورنالار، ندی سیزین احوالینیز، حالینیز؟ بیر عرضی-حال یازیم، یارا یئتیرین،

دوست یانینا دوشر ایسه یولونوز. گؤیده شاهین، شونقار، گؤروب چاشارسیز، اول اوجا داغلاری نه جور آشارسیز؟ اووچو گؤرن کیمی قاناد آچارسیز، قیشدا قاراماندی سیزین ائلینیز. دردلی کرم دئیر: اوغرادیم درده،

 جانیم قوربان اولسون مرد اوغلو مرده،  

یازیق دورنا، نه گزرسن بو یئرده؟ یوخمو سیزین وطنینیز، ائلینیز؟ از گئتدیلر، چوخ گئتدیلر، گونلرین بیرینده گئدیب قارص شهرینه چاتدیلار. بورادا بیر قارییا قوناق اولدولار. آداملار هر طرفدن تؤکولوب گلدیلر. قوناغا خوش گلمیسیز دئدیلر، اونلارین احوالینی سوردولار. آلدی کرم، توپلاشانلارین سواللارین بئله جاواب وئردی: هئی آغالار، نئجه اولور حالی یاردان آیریلانین؟ اخیر دوشر قوربت ائله یولو یاردان آیریلانین. قرنفیللر توتماز ایمیش، گول تیکانسیز بیتمز ایمیش، ایشه، گوجه گئتمز ایمیش الی یاردان آیریلانین. شاهینلر گؤیه چکیلیر، دورنالار گؤله تؤکولور، اون بئش یاشیندا بوکولور بئلی یاردان آیریلانین. کرم قوجالار، دئیرلر،

بو یئرده اؤلر، دئیرلر، دینمز، لال اولار دئیرلر- دیلی یاردان آیریلانین. اداملار کرمه دئدیلر: - آشیق، آرزون ندی؟ بیزدن نه خلت ایسته ییرسن؟ کرم دئدی: - من خلت آلان آشیقلاردان دئییلم. سیزه بیر قاتار سؤز اوخویاساغام، کؤنلونوز شاد اولسون. الدی کرم، دئدی: قدیر مؤولام، بودو سندن دیلگیم، بو گلن قیشیمیز باهار، یاز اولا. گونده اوتوز ایکی دؤوران ائیله یه، عکسینه چئوریلیب بوران، تئز اولا. گونده مین تویوغوم یومورتا سالا، یاخشی کاتیب گرک حسابین آلا، مین بیر قارا قارغا گؤیرچین اولا، بیر دام دولو اؤردک ایله قاز اولا. مین سفینم دریالاردا قیشلایا، قیرخ قولونلو مین قیسراغیم کیشنه یه، یانیندا ایکی یوز چوبان ایشله یه، هر بیر سوروسونده مین بئش یوز اولا. دلی کؤنلوم عشق اودونا قالانا، هئی آغالار، سؤزوم یاددا ساخلانا، دوققوز تؤوله آتیم حاضیر باغلانا، بیر-ایکی توولا دا خام یاغیز اولا. دردلی کرم دئیر: دونیانین ایشی، گؤزومنن آخیتدیم هئی قانلی یاشی،

تا بو قدر مالا مالیکسه کیشی، بیر الی ایراندا صافی اوز اولا. صوفی بونلاردان دا کئشیشی سوروشدو. دئدیلر: - کئشیش بورادان کئچیب، بایازیدا گئتدی. کرمله صوفی گئجه نی اورادا قالدیلار، سحر تئزدن یولا دوشوب گئتمه یه باشلادیلار. کرم داغ اتگی ایله گئدیردی. گؤردو بو یئرده او قدر توراس، کهلیک وار کی، او طرفه-بو طرفه اوچوشورلار. بیردن بیره کرمی حالی پریشان اولدو. سازی سینه سینه باسیب، حالینا موناسیب گؤرک نه دئدی: امان فلک، کؤمک ائیله بو گونده، ناگاه یئرده گلدی آلدی درد منی! گئجه-گوندوز اودا یاندیم، آلیشدیم، توتدو، یولوم-یولوم یولدو درد منی! قوربت ائلده اوسا داغلار آشالی، اه ائتدیکسه قارا باغریم دئشه لی، من اصلیمدن آیری دوشدوم، دوشه لی، دلیک-دلیک ائتدی، دلدی درد منی. فلک منیم ایله عیناد ائیله دی قم ایله هیجراندی تؤهفن، سؤیله دی، کسکین قیلیسییلا باغریم تئیله دی، بؤلوک-بؤلوک ائتدی، بؤلدو درد منی. گئجه گوندوز کسمز گؤزومون یاشی، سالدی قانلی فلک باشیما داشی، ارضروم داغیندا کئچیردیم قیشی، اخیر چؤلدن چؤله سالدی درد منی. بیلمم خییالیمدی، یوخسا دوش کیمی، گلدی کئچدی بوران کیمی، قیش کیمی، دردلی کرم یوواسیندا قوش کیمی،

توتدو، یولوم-یولوم یولدو درد منی. سؤز تامام اولدو، یوللارینا داعوام ائدیب، منزیلبمنزیل آخیردا گئدیب، آلتویا چیخدیلار. بورادا دا خبر توتدولار کی، کئشیش بایازیدا گئدیب. بیر قدر چؤرکدن-

 زاددان یئییب، بایازیدا طرف گئتمگین بیناسین قویدولار.  

از گئتدیلر، چوخ گئتدیلر، بایازیدین یانیندان بیر دسته قیزا راست گلدیلر. کرم باخدی، قیزلارین ایچینده بیر قیز وار کی، میثلی، برابری یوخدو. کرمین عاغلی باشیندان چیخدی، آلدی سازی، گؤرک نه دئدی: صوفی لعلم، بو گون بیر گؤزل گؤردوم، قودرتدن چکیلیب قارا قاشلاری. ایسته دیم کی، نازلی یاری دیندیرم، اشیق اؤلدورمکدی، بیلدیم، ایشلری. نه گؤزل بزه نیب کؤنول سوناسی، تاختی-سولئیماندی یارین سینه سی، مین ناز ایله بسله ییبدی آناسی، دال گردنی بورویوبدو ساچلاری. کرم دئیر: دورلو-دورلو حالی وار، یاناغیندا دنه-دنه خالی وار، اغزی شکر، دوداغیندا بالی وار، اینسه صدف دوزولوبدو دیشلری. سؤز تاماما یئتدی. یولا دوشوب بیر منزیل گئتیب بایازیدا چاتدیلار. کرم شهرین کناریندا دایاندی. دؤنوب بیر گلدیگی یولا باخدی، سازی دؤشونه باسیب دئدی: صوفی قارداش، اوچ مملکت کئچیردیک، بیری ایران، بیری توران، بیر گیلان. ایگیدین باشینا اوچ دؤولت قونار، بیری عاغیل، بیری گنسلیک، بیری شان. کئشیشین ائتدیگی بئله ده قالماز،

ایکی محبوب قلبین او سایا سالماز، بو دونیا اوزونده اوچ شئی زای اولماز: بیر یاخشیلیق، بیری ائلم، بیری نان. درد، قم الیندن من ده بئزارام، بو دردلری قلم آلیب یازارام، چوخ یئرلری ایننن سورا گزرم، بیری طیفلیس، بیری بایازید، بیری وان. کاش کی، کرم مورادینا ایریدی، قیسمت اولوب، یارین اوزون گؤریدی، قدیر مؤولام منه اوچ درد وئریدی: بیری آلیش، بیری توتوش، بیری یان. کرم سؤزونو تامام ائله ییب، یول باشلادی. گلیب، گلیب، وان شهرینه چاتدیلار. شهرین کناریندا کرم دایاندی. آداملاردان کئشیشین ارداهانا گئتدیگینی بیلیب، یولا دوشدولر، اوزاق یولو یاخین ائدیب ارداهانا چاتدیلار. اصلی کرمین یادینا دوشدو، آلدی، گؤرک نه دئدی: بیزیم ائلدن سوردوم، بورا گتیردیم، بو داغلاردان آشان بیر سونام تکدی. چیسکین اولدو، بوران اولدو، ایتیردیم، بو داغلاردان آشان بیر سونام تکدی. ائنر یئرده دومان چیسکینی بسلر، اشیق اولان اؤز م`شوقونو سسلر، پیس گونده دوستونو آتماز مرد کسلر، بو داغلاردان آشان بیر سونام تکدی. ایتیردیم اصلیمی دورماز، آرارام، کسیلدی صبیریم، هم یوخدو چارام، من کرمم، عشق اودونا یانارام، بو داغلاردان آشان بیر سونام تکدی.

کرم آداملاردان کئشیشی سوروشدو. آداملار کئشیشین دونن کئچدیگینی خبر وئردیلر. بونلار یولا دوشوب، بیر مودت یول گئتدیلر. بیر داغین اتگینده بونلارین قاباغینا قیرخ هارامی چیخدی، اونلاری هر طرفدن آرایا آلدیلار. کرم احوالی بئله گؤرنده سازی گؤتوروب دئدی: گئجه-گوندوز زاری-زاری آغلارام، منی وطنیمه گؤندر، یا رببی! بو دونیایا گلن گئتمک اوچوندو، بورادان قولونو قورتار، یا رببی! یا رببی، سن ساخلا کؤنلومو قمدن، ایتیردیم عاغلیمی، سان چیخماز تندن، اؤلدوررلر منی، یار گئدر الدن، منیم حالیم سنه یئتر، یا رببی! بو کرمی عشق اودونا یاندیرمان، سئودیگیم قونچایی مندن سالدیرمان، هئی آغالار، ائللری ده گولدورمن، قلبینه مرحمت یئندیر، یا رببی! هارامیلار اونلاری اؤلدورمه ییب، سوروشدولار: - سیز کیمسینیز، هارا گئدیرسینیز؟ کرم دئدی: - من ضیاد خانین اوغلویام. قارا کئشیشین قیزینا آشیق اولموشام. کئشیش قیزینی گؤتوروب قاچیب. اونون دالینا دوشموشم. هارامیلار بیر-بیری نین اوزونه باخیب دئدیلر: - بو حاق آشیغیدی. وار گئت، آشیق، آللاه سنی مورادینا چاتدیرسین. کرمله صوفی بیر قدر گئتدیلر، بیر شهره یاخینلاشاندا کرم دایاندی. صوفی دئدی: - نییه دایانمیسان؟ کرم دئدی: - بیلیرم، کئشیش بوردا دا یوخدو.

صوفی چوخ دئدی، کرم آز ائشیتدی، یئریندن ترپنمه دی. صوفی نالاس کرمی اورادا قویدو، اؤزو خبر توتماق اوچون شهره گئتدی. کرم قالدی تک، قم-غوصه اونو سوغلادی، سازی دؤشونه باسیب دئدی: قلبی هاواینان اوچارسان، ائندیریدیم، کؤنول، سنی. بوداق-بوداق گول دالینا قوندورایدیم، کؤنول، سنی. اوسا داغلار اوسا اولور، گوندوز کئچر، گئجه اولور، گؤر آیریلیق نئجه اولور، قاندیرایدیم، کؤنول، سنی. اوسا داغدان آشیرایدیم، وطنیننن کؤچوریدیم، قوربت ائله دوشوریدیم، یاندیرایدیم، کؤنول، سنی. اؤردگی اوولارلار گؤلده، شاهینی بسلرلر قولدا، بعضیرگان کئچدیگی یولدا ائندیریدیم، کؤنول، سنی. دردلی کرم قان عاغلییار، اورگین چارپاز داغلییار، یاز، باهاری یاس ساخلییار، گولدوریدیم، کؤنول، سنی. سؤز تزسه تامام اولموشدو کی، صوفی گلدی، کئشیشین اورادا اولمادیغینی خبر وئردی. کرمین اورگی دمیرچی کوره سی کیمی یانماغا باشلادی. سازی دؤشونه باسدی، اوزونو یوللارا توتوب دئدی:

قاسید یاردان یامان خبر گتیردی، منه نه عصاییب حال اولدو بو گون. بیر اولان دردیمی یوزه یئتیردی، یاندی قارا باغریم، کول اولدو بو گون. مسنون کیمی گزدیم سهرانی، داغی، فلک شربتیمی ائیله دی آغی، ایدی قامتیمی اصلی فراغی، توتولدو دیللریم، لال اولدو بو گون. من کرمم، نئیله میشم، نئیلگیم، خنجرالیب، باغریم باشین تئیلگیم. اوز توتوب قوربته سفر ائیلگیم، قارلی داغلار منه یول اولدو بو گون. صوفی گؤردو کی، کرمین حالی چوخ پریشاندی. ایسته دی اونا تسللی وئرسین، دئدی: - عزیزیم، گنه نه اولدو سنه؟ کرم سازی باسدی دؤشون: صوفی، نه سورورسان منیم حالیمی؟ یاردان آیریلاندا شاد اولماز کؤنول. لئیلیسین ایتیرمیش مسنونا دؤندوم، هر گئجه پاپاغی تاس اولماز کؤنول. بیر دم سیاح اولور، قیلینس قورشانیر، بیر دم توراب اولوب، یئره دؤشه نیر، بیر دم هاقدان قورخو چکیر، اوشنیر، بیر دم پادشاهنان باس اولور کؤنول. بیر دم گؤلده بیتن قارغی، قامیشدی، بیر دم باغچالاردا دورلو یئمیشدی، بیر دم قیزیل اولور، بیر دم گوموشدو، بیر دم پاسلانیر دا، تونس اولور کؤنول.

بیر دم پییادادی، بیر دم آتلانیر، بیر دم شکر اولور، بیر دم دادلانیر، بیر دم اولور هر صفایا قاتلانیر، بیر دم زهردن ده آسی اولور کؤنول. بیر دم آبدال اولور، گیریر شاللارا، بیر دم دللال اولور، دوشور دیللره، بیر دم یولچو اولور، گئدیر یوللارا، بیر دم کئچنلردن باس آلیر کؤنول. کرم دئیر: آخیرینا ایریلمز، عرب آت یورولور، کؤنول یورولماز، کؤنول بیر سارایدی سینار، هؤرولمز، ازه لی، سوراسی کؤچ اولور کؤنول. کرم سؤزو قورتاریب، آیاغا قالخدی، یئنه ده گئتمه یه باشلادیلار. گئتهاگئت، بیر آخشام گؤزل بیر کنده گلیب چیخدیلار. ائله کرمی چیینینده ساز گؤرسک کند اهلی تؤکولدو، اونلاری حؤرمتنن، ایززتنن بیر ائوه آپاردیلار. بلی، قوناقلار یئدیلر، ایچدیلر، اورادان-بورادان صؤحبت ائله دیلر. کرمدن بیر نئچه سی اوخوماغینی خواهیش ائله دی. کرم آیاغا قالخدی، سازی دؤشونه باسدی، دئدی: ای هزارات، اصلیم گئتدی الیمدن، قالدیم بوردا آهو-زارین ایچینده. باغی توتدو شئیدا بولبول ناله سی، بولبول باغری یاندی خارین ایچینده. سئیراغیبین فیتنه سینه ایناندیم، فیرقت نه اولدوغون سونرادان قاندیم. یارین هسرتیننن آلیشدیم، یاندیم، پیلتتک قوورولدوم نارین ایچینده. کرمم، نئسولدو اولوسوم، ائلیم،

یار، یار سؤیله مکدن لال اولدو دیلیم، خان اصلیمدن آیری بوکولدو بئلیم، قالدیم ناموس ایله آرین ایچینده. مجلیس اهلی کرمین بئله یانیقلی-یانیقلی اوخوماغیندان پریشان اولوب، صوفیدن سوروشدولار: - بو آشیق هارالیدی؟ نییه قملی-قملی اوخویور؟ صوفی بوتون احوالاتی اولدن آخیرا مجلیس اهلینه دانیشدی. صوفی نین بو دانیشماغیندان کرمین اورگی بیر آزدا اود توتوب یانماغا باشلادی. سازی دؤشونه میندیریب دئدی: ای عاریفلر، گلین سیزه سؤیلگیم، ایستکلی دوست مننن آرالی دوشدو. ایللر هسرتییم، آیلار آیریسی، سینم بایغو کیمی یارالی دوشدو. یئنییئتمه، اون اوچ، اون دؤرد یاشیندا، عئیبی یوخدو کیپریگینده، قاشیندا، اخشام، صاباح بولاخلارین باشیندا، یادیما داغلارین مارالی دوشدو. کرمم، یوللاریم توز، قوبار اولدو، بوران اولدو، چوغون اولدو، قار اولدو، دوست باغیندا هئیوا اولدو، نار اولدو، بو ایل بیزیم باغلار قورالی دوشدو. کرم سؤزو قورتاریب یولا دوشدو، صوفی ده اونون دالینسا. آز گئتدیلر، اوز گئتدیلر، گئدیب بیر چایین کنارینا چاتدیلار. کرم باخدی کی، ساغ طرف قایا، سول مئشه ، قاباق دا چایدی. دایانیب، صوفییا دئدی: - صوفی له له، اَیلن بو یئرلردن اصلی خانی سوروشوم، بلکه بونلار بیزه اونون یئرینی دئدیلر. صوفی دایاندی. آلدی کرم گؤرک قایادان، مئشه دن، چایدان اصلینی نه سور سوروشدو:

سندن خبر آلیم، آی ساری قایا، منیم اصلیم بورالاردان کئچدیمی؟ موبارک کؤلگنله سالیرسان سایا، منیم اصلیم بورالاردان کئچدیمی؟ ساری قایا دیله گلیب، آلدی، گؤرک ثاوابیندا نه دئدی: سنه خبر وئریم آشیقلار خاصی، سنین اصلین بوردان گلدی ده گئتدی. یانیندا ایدی آتاسی ایله آناسی، لپیرین اوزومه سالدی دا گئتدی. الدی کرم: سندن خبر آلیم، آی قارا مئشه ، قلمی قودرتدن چکیلمیش قاشا، بوروموسن داغا، داشا بنؤوشه، منیم اصلیم بودالاردان کئچدیمی؟ مئشهده دیله گلیب، کرمین ثاوابیندا دئدی: یارین سالدی سنی اولمازین قمه، دایانمازمی یاخشی یگید بو دمه؟ گونش کیمی قوندو منیم سینمه، اصلی مندن بیر گول آلدی دا گئتدی. کرم اوزونو توتدو چایا، دئدی: ابی-حیات کیمی دایم آخارسان، حاقین سامالینا هردن باخارسان، دولانا-دولانا ائولر ییخارسان، منیم اصلیم بورالاردان کئچدیمی؟

سای دا دیله گلیب، کرمه بئله ثاواب وئردی: کرم ساخلار اونون همیشه یاسین، یانینا آلمیشدی آتا-آناسین، هم ایچیب هه می ده دولدوردو تاسین، اتلارین سویوما سالدی دا گئتدی. سؤز تاماما یئتدی. کرم او یانا، بو یانا باخیب، گؤردو چایین اوستونده بیر کؤرپو وار. گلدی کؤرپونون یانینا. سازی دؤشونه باسدی، اوزون توتدو کؤرپویه، آلدی، گؤرک نه دئدی: یولوم گلدی سنه چیخدی، کؤرپو، اصلیمی گؤردونمو؟ سئیراغیبلار منی ییخدی، کؤرپو، اصلیمی گؤردونمو؟ قارا قایاداندی داشین، بللی دئییل سنین یاشین، اسکیک اولماز تر ساواشین، کؤرپو، اصلیمی گؤردونمو؟ دردلی کرم گلیب دورار، قول کیمی بوینونو بورار، اصلی خانی سندن سورار، کؤرپو، اصلیمی گؤردونمو؟ کرم سؤزونو موختصر ائله ییب، گئتمک ایسته ییردی کی، بیردن قاباقلارینا بیر

 جئیران چیخدی. کرم جئیرانی گؤرن کیمی سازینی میندیردی سینه سینه، گؤرک جئیراندان 

اصلینی نه سور خبر آلدی: سندن خبر آلیم، آی گؤزل جئیران، اصلی، کئشیش بورالاردان کئچدیمی؟

مینیب عشق سمندین، اولموشام روان، چوبان کؤرپوسوندن بیر سو ایچدیمی؟ کرم بئله دئینده جئیران دیله گلیب، گؤرک کرمه نه ثاواب وئردی: سنه خبر وئریم، آی ساوان اوغلان، اصلی آناسیله دوشدولر یولا. بیر سحر واختیندا گؤردوم کی، بوردان یانیندا آتاسی کئچدیلر سولا. الدی کرم: بو آیریلیق اَیدی منیم قددیمی، اغیر ائلده بدنام ائتدی آدیمی، کرم گلسین، منی تاپسین دئدیمی؟ گیزلی-گیزلی سیررین سنه آچدیمی؟

 جئیران:  

مورادا یئتیرسین سنی یارادان، سئیراغیبلار گؤروم چیخسین آرادان، سئودیسیگین کؤچله کئچدی بورادان، باخمادی اصلی خان نه ساغ، نه سولا. الدی کرم: نه زاماندی بو یئرلرده دوروبسان، سینیق کؤنلوم قارا داشا ووروبسان، اصلی خانی سن آغلارمی گؤروبسن؟ یوخسا گولوب بو داغلاری آشدیمی؟

 جئیران:   

قدیر مؤولام هئچدن یاراتمیش بیزی، گئجه یه قاتدیلار گونلو گوندوزو، کرم، اصلی خانین آخیرکی سؤزو: ارضروما وارسا کؤنلوم خوش اولا، الدی کرم: کرم دئیر: کیمه دئییم دردیمی؟ سیراغیبلار قونچا گولو دردیمی؟ وارسام ارضروما گؤررم اصلیمی، یوخسا کئشیش آلیب یئنه قاچدیمی؟

 جئیران:  

مؤولام سنه کؤمک اولسون بو ایشده،

 جئیران دئیر: چاپ سمندین یئریشده،  

ارضروما واردی زالیم کئشیش ده، خبر وئردیم قیسمت سنه توش اولا. کرم اصلی خانی جئیراندان دیلله ده خبر آلدی. جئیران دئدی: - سنین آختاردیغین کئشیش ارضروما طرف گئتدی. کرم جئیراننان آیریلیب، یولا دوشدو. گئدیب، گئدیب، بیر اوبایا چاتدیلار. بورانین آداملاری یامان قوناق سئومه یه ن آداملار ایدیلر. کرمگیل بورادا بیر قدر گزیب دولاندیلار، بونلارا هئچ کیم یاخین گلمه دی. کرم باخدی کی، ائله اداملار او طرف، بو طرفه کئچیر، آما هئچ کیم اونلارین حالینی سوروشمور. کرمین اورگی قوبارلاندی، سازینی دردلی سینه سینه میندیردی، زیلینی زیل، بمینی بم ائله دی، آلدی، گؤرک نه دئدی: قوربت ائلده قریب-قریب آغلارام، موشکول حالیم بیلدیرن یوخ، بیلن یوخ! گئجه-گوندوز فغان قیلیب یانارام، اغلادان یوخ، گولدورن یوخ، گولن یوخ!

ترک ائله دیم من آتامی، آنامی، گؤلومدن اوچوردوم تئللی سونامی، خنجر آلیب درد اویلاغی سینه می، تئیله ین یوخ، دیندیرن یوخ، دیلن یوخ! دردلی سینم دویونلرم، داغلارام، اغ گئیمرم، قارالاری باغلارام، درد الیندن آه چکرم، آغلارام، گؤزوم یاشین سیلدیرن یوخ، سیلن یوخ! کرم، یئتمه دیم من اصلی خانا، شای بیلدیم اؤلومو بو یازیق سانا، گئجه گوندوز قفله ایشلر هر یانا، اوز چئویریب بو ویرانا گلن یوخ! سؤز تاماما یئتدی. هاچاننان هاچانا بیر قوجا کیشی گلیب بونلارا سالام وئردی. صوفی قوجایا دئدی: - آی قوجا، بورا نئجه یئردی؟ بورادا هئچ قوناغا-زادا باخان یوخدو. قوجا کیشی دئدی: - ائلدی، اوغلوم، من ده بورالی دئییلم. پیرانی کرمین کیم اولدوغونو بیلیب دئدی: - آشیق، سنین آختاردیغین کئشیش دونن بورادان کئچیب گئتدی. گئت، آللاه سنه یار اولسون! کرم اورادان چیخیب گئتمگین بیناسین قویدو. ائله بیر قدر گئتمیشدیلر، بیر ده گؤردولر کی، گؤی اوزونده بیر دورنا تک-تنها سوزوب گئدیر. کرم صوفینی ساخلاییب، گؤرک دورنایا نه دئدی: گؤی اوزونده سوزوب گئدن تک دورنا، قملی-قملی اؤتمه، کؤنول شاد دئییل. سن ده منیم تکی یاردان آیریلدین، قملی-قملی اؤتمه، کؤنول شاد دئییل. ملول-ملول گؤی اوزونده سوزرسن،

سیاح اولوب اؤلکهلری گزرسن، سوزوشونده خان اصلیمه بنزرسن، قملی-قملی اؤتمه، کؤنول شاد دئییل. دردلی کرم آتدی ناموس، آرینی، یولوندا صرف ائتدی بوتون وارینی، هئی آختاریر، تاپمیر اصلی یارینی، قملی-قملی اؤتمه، کؤنول شاد دئییل. سؤز تامام اولدو، بیر گون یول گلدیکدن سونرا بیر بولاق باشیندا بیر دسته گلین-قیزا توش اولدولار. کرم بو قیزلارین ایچینده اصلییه بنزر بیر قیز گؤروب، سازینی الیب سینه سینه، گؤرک نه دئیسک. الدی کرم: سو باشیندا دوران گلینلر، قیزلار، اللی گلین، خان اصلیمه بنزرسن. دوغروسون سؤیلرلر حاقی سئونلر، خاللی گلین، خان اصلیمه بنزرسن. کرم بئله دئینده، هامان قیز قولاج ساچلارینی سینه سازی ائدیب، گؤرک کرمه نه جواب وئرجک. الدی قیز: اشیب، آشیب قارلی داغلار گلیبسن، وار گئت بوردان، سنین یارین دئییلم. ایتیردین عاغلینی، دوشدون چؤللره، وار گئت بوردان، سنین یارین دئییلم. الدی کرم: خان اصلی تک یاناغیندا خالین وار، اینجه دن لاپ اینجه عجب بئلین وار،

دهانیندا بالدان شیرین دیلین وار، اللی گلین، خان اصلیمه بنزرسن. الدی قیز: دینمه، آشیق، سنی چکرلر دارا، سالدیررام زیندانا، ووردوررام یارا، اوزوش بیزلردن، قیل باشینا چارا، وار گئت بوردان، سنین یارین دئییلم. الدی کرم: دردلی کرم اوجا-اوجا داغ آشدی، اشیبان دا قوربت ائللره دوشدو، اوچورتدوم ترلانی، سارا ایلیشدی، اللی گلین، خان اصلیمه بنزرسن. الدی قیز: گوللو خانیم گول رنگینی سولدورار، اشیق اولان معشوقونو گولدورر، بیر نیشانلیم واردی، سنی اؤلدورر، وار گئت بوردان، سنین یارین دئییلم. سؤز تامام اولدو. صوفی قیزلاردان کئشیشی خبر آلدی. قیزلار دئدیلر: - کئشیشگیل دونن بورادا ایدیلر، ائله بو گون چیخیب گئتدیلر. صوفی کرمی آلیب، بیر باش قیزلارین گؤستردیکلری طرفه گئتمکده اولسونلار، سیزه دئییم کئشیشدن. کئشیش بورادان چیخیب، گونه بیر منزیل، گوندوزو گئجه یه قاتدی، گئجه نی گوندوزه، گلیب چاتدی قئیصرییه، بیر باش اؤزونو پاشانین یانینا یئتیریب دئدی: - من بیر موسلمان آشیغی نین الیندن قیزیمی گؤتوروب قاچمیشام. اونون الیننن منه دینجلیک یوخدو. ایندی سیزه پناه گتیرمیشم. ایذن وئر. مملکتینده

یاشاییم. آنجاق بیر شرطله کی، هامان آشیق گلیب بورالارا چیخسا، سنین رعیتین منیم ائویمی اونا گؤسترمه سین. پاشا راضی اولوب، کئشیشه خلوت یئرده بیر ائو وئردیکدن سونرا، امر ائله دی کی، باشقا تورپاقدان بورا کرم آدیندا آشیق گلسه، توتسونلار، هر کیم ده کئشیشین ائوینی هامان کرمه گؤسترسه، دار آغاجیندان آسیلاساق. بئله بیر امردن سونرا کئشیش پاشادان چوخ راضی قالدی. شهر اهلی ده گؤز- قولاق اولدو کی، عوثمانلی تورپاغینا کرم آدیندا کیم گلسه توتوب پاشایا وئرسینلر. ایندی کئچک اسل مطلبه. کرم صوفیینن نئچه گون، نئچه گئجه یول گلیب، بیر قارلی داغین اتگینه چاتدیلار. بو داغلار گنجهداغلارینا یامان اوخشاییردی. کرمین اورگی سوشا گلدی، الدی، گؤرک نه دئدی: قارشی دوران قارلی داغلار، داغلار بیزیم داغلارمولا... اغ بیرچکلی قوجا آنام اوغول دئییب، آغلارمولا... مککه دن گلن هاسیلار، اورگیمده وار آسیلار، ائومیزده کیسوت باسیلار قارداش دئییب، آغلارمولا... فلک، ندی منیم خاتام، نه ملولام، نه ده شادام؛ اغ ساققاللی قوجا آتام کرم دئییب، آغلارمولا... سؤز تامام اولدو. ائله بونلار گئتمک ایسته ییردیلر کی، بیردن هاوا پوزولدو، هر یئری دومان-چیسکین بورودو شیددتلی قار یاغدی. صوفی حالی بئله گؤروب دئدی: - آمان کرم، اؤلوب بورادا قالاساغیق. گل گئری دؤنک. قیش قورتارار، سونرا گه لریک. کرم اونون ثاوابیندا آلدی، گؤرک نه دئدی:

دلی کؤنول قالخدی، فغان ائیله دی، گئدممزسن، کرم، قیشدی، گئری دؤن! قالمادی ماسالیم بوراندان، قیشدان، گئدممزسن، کرم، قیشدی، گئری دؤن! یاغیش یاغار، یئرین اوزو یاش اولار، چیسکین اولار، بوران اولار، قیش اولار، هاوا بئله قالماز، یئنه خوش اولار، گئدممزسن، کرم، قیشدی، گئری دؤن! گئدر قیش اَییامی، گؤرریک یازی، گولوستانا دؤنر داغلارین اوزو، ائی فلک، نه اولار، آغلاتما بیزی، گئدممزسن، کرم، قیشدی، گئری دؤن! هاوا آچیلمادی، داها دا پیسلشدی. یولو ایتیردیلر. آلدی کرم: بورانلی داغلاردا یولوم ایتیردیم، چاغیریرام آمان فلک، آمان هئی!.. بیر یانیمدا یاغیش یاغار، قار سپر، بیر یانیمدا چیسکین بولود، دومان هئی!.. اخشام اولدو، گؤرممه دیم یولومو، سویوق آلدی آیاغیمی، الیمی، گؤزوم آلتدا آلدیم یئنه اؤلومو، داها یوخدو ساغلیغیما گومان هئی!.. داغلار، هوممت ائدین بوردا قالماییم، قالیرسان دا قوربت ائلده اؤلمگیم، قاری دوشمنلره مؤهتاس اولماییم، امان فلک، منیم حالیم یامان هئی!.. قوردلار، قوشلار ییغیلارلار لئشیمه،

باخمازلار گؤزومدن آخان یاشیما، قوربت ائلده بلا گه لر باشیما، دوغرو دؤنمز چرخ-فلک، آمان هئی!.. دار گونومده کیمسه یئتمز فریادا، چووغونون الیننن گلمیشم دادا، کرم دئیر: اؤلوم هاقدی دونیادا، اخیرتده قارشی گلسین ایمان هئی!.. کرم سؤزونو قورتاران کیمی شاققیلتی، گورولتو قوپدو. ایلدیریم چاخدی. کرم سازی دؤشونه باسیب دئدی: امان فلک، بودو سننن دیلگیم، قویما منی یاری یولدا قیش گونو. کرم ائیله، بیرجه یاپیش الیمنن، یئتیر مورادینا سن بو دوشکونو. چووغون، بوران آلیب دؤرد بیر یانیمی، سویوق کسیر ایلیگیمی، قانیمی، وعدم تامامدیسا گل آل جانیمی، فلک، منه میننت ائتمه بئش گونو. کرمم، بیر کیمسه یئتمه دی دادا، اصلی بیوفادی، هئچ سالماز یادا، عؤمروم کئچدی آهو-زارلا دونیادا، چوخ آختاردیم، بیر گؤرمه دیم خوش گونو. سؤز قورتاران کیمی بیر ده گؤردولر کی، بیر نورانی کیشی ظاهیر اولدو، دئدی: - قم ائلمگین، داردا قالمازسینیز. سیزی داردان قورتاران تاپیلار. یومون گؤزونوزو! کرمله صوفی گؤزلرینی یومدولار. نه قدر کئچدی بیلمیرم، بیر ده نورانی کیشی دئدی: - آچین گؤزلرینیزی!

گؤزلرینی آچیب گؤردولر کی، بیر باشقا یئرده دیلر. نورانی کیشی-زاد دا یوخدو. اما یئر نه یئر... ائلدی کی، گول گولو چاغیریر، بولبول بولبولو. کرم گؤز دولاندیریب گؤردو کی، اووچولار ایکی قوزولو بیر جئیران ووروبلار. جئیران بالالاری نین یانیندا اینیلده ییر. قیزیل قانی گوللری قیپ-قیرمیزی قیزاردیب. کرمین اورگی قانا دؤندو، آلدی سازی، گؤرک نه دئدی: من، آی صوفی له له، نئجه یانماییم؟ اصلی خانین جئیرانیدی بو جئیران، اینصافدیمی احوالینی بیلمگیم؟ اصلی خانین جئیرانیدی بو جئیران. گولله دییب بو جئیرانین اوزونه، قان تؤکولوب توپوغونا، دیزینه، گؤزو بنزر خان اصلینین گؤزونه، اصلی خانین جئیرانیدی بو جئیران.

 زالیم اووچو بونو الدن سالیبدی،  

دؤرد یانینی قارا قانلار آلیبدی، کیمسه سی یوخ، ملول، موشکول قالیبدی، اصلی خانین جئیرانیدی بو جئیران. یارالاری کؤهنه دئییل، تزه دی، سییاه سورمه آلا گؤزه مزه دی، بو جئیرانی کیم آل قانا بزه دی؟ اصلی خانین جئیرانیدی بو جئیران. کرمم، دوشموشم من قوربت ائله،

 جئیرانا چیخمیشدی جئیرانی چؤله،  

اغلارام، سیزلارام من بوندان بئله، اصلی خانین جئیرانیدی بو جئیران.

ائله بو دمده بیر ده گؤردولر کی، اووچولار داغدان ائنیب گلیرلر. کرم بونلاری گؤرن کیمی سازی گؤتوروب، گؤرک اووچولارین گلمگینی جئیرانا نه جور خبر وئردی: سوره-سوره اووچو داغدان ائندیرن قاچ، قوزولو جئیران، یاد اووچو گلدی. اوخو ایله ووروب تورپاغا سرن، قاچ، قوزولو جئیران، یاد اووچو گلدی. گؤزل چمنلیکده جئیران سوروسو، سورودن آیریلمیش اونون بیریسی، قانا بویانیبدی گؤزل دریسی، قاچ، قوزولو جئیران، یاد اووچو گلدی.

 زالیم اووچو دوشموش، گلیر ایزینه،  

ال قانی آخیتمیش ایکی دیزینه، میلچکلر قونوبدو قانلی اوزونه، قاچ، قوزولو جئیران، یاد اووچو گلدی. بئله می اولور اووچولارین بره سی، قولتوغوندان ووروب، سیزلار یاراسی، حکیمه گؤستریب، یوخدو چاراسی، قاچ، قوزولو جئیران، یاد اووچو گلدی. قووا-قووا ائندیردیلر یازییا، توش ائتدیلر ایتی دیشلی تازییا، ایش موشکولدو، گل باخما سن قوزویا، قاچ، قوزولو جئیران، یاد اووچو گلدی. سوره-سوره یئندیردیلر داغلاردان، ال سوسنلی باغچالاردان، باغلاردان، کرم دئیر گئچدیجگیم یوللاردان، قاچ، قوزولو جئیران، یاد اووچو گلدی.

یارالی جئیران نه قدر ائله دیسه، بالالارینی چکیب بیر یانا گئده بیلمه دی. اؤزو ده بالالاریندان آیریلماق ایستمیردی. کرم احوالی بئله گؤرنده اووچولارین قاباغینا گئتدی. اووچو اوندان سوروشدو: - بورالاردا بیر یارالی جئیران گؤرمه دینیزمی؟ کرم باشقا بیر اوچوروم دره گؤستریب دئدی: - جئیران قاچیب او دره یه گئتدی. اووچولار دره طرفه یؤنلدیلر. کرم گلیب جئیرانین یارالارینی باغلادی، اپاریب یاخینداکی ماغارایا قویدو. سونرا سازینی دیللندیریب، دردلی-دردلی اوخوماغا باشلادی: بو سفر آیی نین ییرمی بئشینده بو داغدا بیر جئیران آغلار، اینیلدر! ایکی کؤرپه قوزو واردی دؤشونده، بو داغدا بیر جئیران آغلار، اینیلدر! اوخلار دییب اونو جاندان سالمیشدی، دؤرد یانینی قیزیل قانلار آلمیشدی، قوزولاری ملول، محزون قالمیشدی، بو داغدا بیر جئیران آغلار، اینیلدر! اینسان عجب زالیم اولدو، قازیلار، سینه سینده یارالاری سیزیلار، کرم کیمی اؤز یوردونو آرزولار، بو داغدا بیر جئیران آغلار، اینیلدر! چوخلو اوخ یاراسی واردی جانیندا، بیر جوت بالالاری آغلار یانیندا، کرم دئیر: آناسی یوخ یانیندا، بو داغدا بیر جئیران آغلار، اینیلدر!

صوفی کرمی قالدیریب گؤتوردو. گلیب، گلیب بیر اوبایا چیخدیلار. کرم برک خستلنمیشدی. اوبانین لاپ کنارینا چاتاندا گؤیده بیر دسته دورنا گؤروندو. کرم سازی گؤتوروب، دورنالارنان اؤز ائللرینه گؤرک نه سیفاریش ائله دی: دورنا، گئدر اولساز بیزیم ائللره، قوربتده بیر خسته گؤردوم دئیرسیز. اگر سیزدن سوال ائدن اولارسا، قوربتده بیر خسته گؤردوم دئیرسیز. من اوچاردیم، قانادلاریم یورولدو، قوربت ائلده قارا باغریم قوورولدو، خسته دوشدوم، ایندی بئلیم قیریلدی، قوربتده بیر خسته گؤردوم دئیرسیز. قوربت ائلده ملول، محزون اولموشام، عشقینه دوشه لی مجنون اولموشام، بیر ساچی لئیلایه مفتون اولموشام، قوربتده بیر خسته گؤردوم دئیرسیز. خسته دوشدوم، کیمسه بیلمز حالیمی، الیمدن آلدیردیم قونچا گولومو، نه دییاره توتوم گئدیم یولومو؟ قوربتده بیر خسته گؤردوم دئیرسیز. دردلی کرم خسته دوشوب، اینیلدر، اه ائتدیکسه قولاقلاری جینگیلدر، بلکه مؤولام بیزه ایمداده گه لر، قوربتده بیر خسته گؤردوم دئیرسیز. سؤز تامام اولدو. خسته لیگه باخماییب، قالخیب، یئنه ده یولا دوشدولر. بیر قدر گئدیب، بیر قبریستانا چاتدیلار. قبریستانی گؤرن کیمی کرم بیر تهر اولدو. سازی دؤشونه باسیب آلدی، گؤرک نه دئدی:

یئنه وطنیمدن اولدوم دیدرگین، خسته دوشدوم، قوربت ائللرده قالدیم. سئیراغیبلار آرالیخدا چوخالدی، ارتدی یامانلاریم، چوللرده قالدیم. یانارام، یانارام، توتونوم توتمز، اه چکرم، آهیم کیمسه یه یئتمز، اصلیمین سئوداسی سریمدن گئتمز، عجب روسوای اولوب، دیللرده قالدیم. کرم ایندی ساتین گزیر اؤلومو، فلک قیردی قانادیمی، قولومو، دومان گلدی، آزدیم ایندی یولومو، چیسکینلی، بورانلی چؤللرده قالدیم. ائله سؤز تازاجا تامام اولموشدو کی، کرمین گؤزو یئره ساتاشدی. گؤردو اوچولوب-داغیلمیش کؤهنه بیر قبرین ایچینده بیر قورو کلله وار. کرم اَییلیب کلله نی گؤتوردو، توزونو سیلیب تمیزله دی، او طرف-بو طرفینه باخیب دئدی: - صوفی له له، بو قورو کلله نی گؤرورسنمی؟ بیر زامان بو دا بیزیم کیمی اینسان ایمیش. بیر زامان اولاجاق بیز ده بئله اولاجاغیق. قوی بوندان بیر نئجه سؤز خبر آلیم. الدی کرم، گؤرک کلله دن نه سوروشدو: بیر سووال سوراییم، خبر وئر منه، سن ده بو دونیادا واردینمی، قافا؟! هئیوانمیدین، اینسانمیدین، نه ایدین؟ تورلو مئیوه لردن یئردینمی، قافا؟! ایریلمیش چنه سی، تؤکولموش دیشی، پوزولموش کیرپیگی، سوزولموش قاشی، همیشه بئله دی فلگین ایشی، بئش واخت نامازینی قیلدینمی، قافا؟! باخمازمیسان آلنینداکی یازینا،

تورپاق دولموش قولاغینا، گؤزونه، هئچ اویدونمو کور شئیتانین سؤزونه، حالال دئیه هارام یئدینمی، قافا؟! کرم سؤزونو قورتاران کیمی کلله دیله گلدی، دئدی: دینله دئییم گلن-کئچن حالیمی، بیر زامان دونیادا من ده وار ایدیم. بیر شاه ایدیم، بلا گلدی باشیما، بوتون عسرلره یادیگار ایدیم. الدی کرم: قافا، بو دونیادا، بیر دئ مردمیدین؟ دونیا مالی اوچون یوخسا قوردمودون؟ اون، اون بئش یاشیندا بیر یگیدمیدین؟ یوخسا آغ ساققاللی پیرمیدین، قافا؟ الدی کلل: من بیر گولدوم، باغچالاردا بیتردیم، لوغمان ایدیم، ائلملره یئتردیم، التمیش ایل یاشادیم، یوز ایل یئتیردیم، شوجاعتلی، آدلی نامیدار ایدیم. الدی کرم: قافا، بو دونیادا یاخشی خاصمیدین؟! دونیا مالی اوچون قارا یاسمیدین؟! یئدیرمز، ایچیرمز بیر ناکسمیدین؟! سوفره سی مئیداندا ارمیدین، قافا؟! الدی کلله:

بیلمز ایدیم من مالیمین حسابین، دوشونمزدیم هئچ آخیرت عذابین، عاقیبت نوش ائتدیم اجل شرابین اؤلن واختا تامام ایختییار ایدیم. الدی کرم: دردلی کرم آه-زارین آرتیرسین،

 جومله موشکول ایشلرینی بیتیرسین،  

نه زاماندان بری بوردا یاتیرسان؟ بو دونیادا اؤلمم دئرمیدین، قافا؟! الدی کلل: من قورو کلله یه م، بوردا اوتوردوم، سنین موشکول ایشلرینی بیتیردیم، یوز اون ایلدی من بو یئرده یاتیردیم، من ده سنین کیمی آشیکار ایدیم. کلله سؤزونو تامام ائیله ین کیمی دیغیرلانا-دیغیرلانا گئدیب یئنه گیردی قبره، یوخ اولدو. کرمگیل یوللارینا داعوام ائله دیلر. قبریستاندان چیخماغا آز قالمیش کرم گؤردو کی، بیر جاوان قیز بیر قبرین یانیندا اوتوروب آغلاییر. آرابیر دوروب قبرین دؤرد طرفینه دولانیر، یئنه اوتوروب باشلاییر آغلاماغا. کرم سازینی سینه سینه باسیب، گؤرک قیزا نه دئیجک: الدی کرم: قاشلاری محرابی، گؤزلری یاغی، اهو گؤزلوم، نه دؤنورسن مزاری؟! اشیغی بند ائدر زولفو، دوداغی، اهو گؤزلوم، نه دؤنورسن مزاری؟!

کرم بئله دئینده قیز قالخیب، دال گردنینه تؤکولموش قولاج ساچیندان اوچ تئل آییریب، گؤرک کرمه نئجه جاواب وئرجک: الدی قیز: اشیق، نه سورورسان منیم حالیمی، یار عشقیله دولانیرام مزاری! نه مودتدی یاندیم فیرقت اودونا، یار عشقیله دولانیرام مزاری! الدی کرم: قارالار گئییبسن، یاسدادی باشین، قودرتدن چکیلیب، قارادی قاشین، اتانمی اؤلوبدو، یوخسا قارداشین، اهو گؤزلوم، نه دؤنورسن مزاری؟! الدی قیز: قارالار گئیمیشم، یاسدادی باشیم، قودرتدن چکیلیب، قارادی قاشیم، نه آتام اؤلوبدو، نه ده قارداشیم، یار عشقیله دولانیرام مزاری! الدی کرم: گون گؤرمه دیم بو دونیایا گله لی، اغلاییبان گؤزوم یاشین سیله لی، نئچه ایلدی سنین یارین اؤله لی؟ اهو گؤزلوم، نه دؤنورسن مزاری؟! الدی قیز:

پاییز اولساق باغچالاردا گول سولار، اغلاییبان گؤزوم یاشی سئل اولار، سئودیسیگیم اؤلن یئددی ایل اولار، یار عشقیله دولانیرام مزاری! الدی کرم: قالخیشیب سونالار، گؤللر قورویوب، اطرافینی چاییر-چمن بورویوب، یئددی ایلسه، ایندی یارین چورویوب، اهو گؤزلو، نه دؤنورسن مزاری؟! الدی قیز: الیمدن آلدیلار گول اوزلو یاری، ارتدی اورگیمین قه می، قوباری، اورگیمده سؤنمور عشقیمین ناری، یار عشقیله دولانیرام مزاری. الدی کرم: یئری هئی، یئری هئی، گؤزو هارامی، اورگیمده قویدون دردی، وره می، خان اصلیمدن بئتر ائتدین کره می، اهو گؤزلوم، نه دؤنورسن مزاری؟! الدی قیز: نازلی دئیر: بئله قویدوق ایلقاری، اغلاماقدان عؤمروم اولوبمو یاری، اچین مزارینی، بیر گؤروم یاری، یار عشقیله دولانیرام مزاری!

سؤز تامام اولدو. قیز باشلادی آغلاماغا. کرم باشا دوشدو کی، قبیرده کی قیزین نیشانلیسیدی، اونو زورگوج ایله قانلی فلک الیندن آلیب. کرم قیزا تسکینلیک وئرندن سونرا دئدی: - گؤزل قیز، بو طرفلرده کؤچ-کولفتلی بیر کئشیش گؤرمه دین؟ قیز جاواب وئرمه دی. کرم نه قدر دئدیسه قیزدان جواب آلا بیلمه دی. باخدی کی، هر نه دئییرسه قیز هئچ بیریسینی ائشیتمیر. اونون فیکری ائله قبیرده دی. چار-ناچار اوندان آیریلدیلار. قبریستانلیقدان کئچیب، آز گئتدیلر، چوخ گئتدیلر، گلیب یئنه ده بیر اوجا داغین اتگینه چاتدیلار. کرم دئدی: - صوفی قارداش، دایان، بوندان سؤز خبر آلیم. الدی کرم، گؤرک داغا نه دئدی:

باشین اوسته شاهین، شونقار سسلنر، الویز داغی، هئچ اسکیلمز دومانین. اتگینده توتی، قومرو بسلنر، الویز داغی، هئچ اسکیلمز دومانین.

تیپی، بوران اولور، یاغیش اله ییر، مئشه نده دولانیر مارال، مله ییر، کوللاریندا تولکو، چاققال اولاییر، الویز داغی، هئچ اسکیلمز دومانین.

سیننده خارلانمیش نملی قار اولور، الت یانیندا باغچا اولور، بار اولور، الما اولور، هئیوا اولور، نار اولور، الویز داغی، هئچ اسکیلمز دومانین.

بئلینده اوتلاییر قویونون، مالین، هینده، هیندوستانا بللیدی حالین، کاروانین، کؤچقونون، ساهین، سالالین، الویز داغی، هئچ اسکیلمز دومانین.

اوجا-اوجا قایان، یاستی داشین وار، شیرین-شیرین اؤتن مین بیر قوشون وار،

کرم کیمی نه بلالی باشین وار، الویز داغی، هئچ اسکیلمز دومانین. کرم سؤزون تامام ائدن کیمی آلویز داغی بونلارا یول وئردی. بورادان کئچیب، گونه بیر منزیل گئدیب، یئنه ده بیر بولاق باشینا چاتدیلار. کرم باخدی کی، بورادا بیر دسته قیز ظارافاتلاشا-ظارافاتلاشا پالتار یویور. قیزلار کرمی گؤرن کیمی توتدولار یاخاجیندان کی: - آشیق، بیزه بیر-ایکی کلمه سؤز دئ! الدی کرم، قیزلارا گؤرک نه دئدی:

بولاق کناریندا پالتار یویانلار، عئینی منیم خان اصلیمه بنزرسیز. یویوب-یویوب گول دالینا سرنلر، عئینی منیم خان اصلیمه بنزرسیز.

ایریسه قاشی وار، اوجو اَیمه لی، کتان کؤینک گئییب، کؤکسو دویمه لی. او دا سیزین کیمی گؤزل، اؤیمه لی، عئینی منیم خان اصلیمه بنزرسیز.

کتان کؤینک گئییب، گولدن تازاجیک. بولبول سیتم ائیلر گوله یازاجیک. او دا سیزین کیمی بیاض، نازاجیک، عئینی منیم خان اصلیمه بنزرسیز.

کرمم، دولاندیم، بورایا گلدیم، سیزی گؤرن کیمی شاد اولدوم، گولدوم، داریلمایین، قیزلار، من اصلی بیلدیم، عئینی منیم خان اصلیمه بنزرسیز. قیزلار، گلینلر هامیسی کرمه آفرین دئدیلر. کرمله صوفی بورادا بیر آز دینجه لیب قالخدیلار. گونه بیر منزیل گلیب، ارضرومون گه دیگینه چاتدیلار. کرم باخدی کی، هاوا قارالیر، دئدی:

- صوفی، دایان، بو داغا بیر-ایکی سؤز دئییم، یوخسا بیزه یول وئرمه یهجک. صوفی حیرصله نیب دئدی: - خئییر، لازیم دئییل. هئچ نه دئمه! ائله هر داغا-داشا سؤز دئیجکسن؟ کرم بیر سؤز دئمه دی. یاواش-یاواش داغین باشینا چیخماغا باشلادیلار. ائله اشیریما آز قالمیشدیلار کی، بیر بوران باشلادی، قار باشلادی، گل گؤره سن. کرم دئدی: - قویمادین داغا بیر-ایکی سؤز دئیم، بیزه یول وئرسین، ایندی اؤلوب بورادا قالاجاغیق. صوفی ایشی بئله گؤرنده باشلادی کرمه یالوارماغا: - آمان، کرم، نه سؤزون وار دئ، بلکه نیجات تاپاق. کرم آلدی سازی، دئدی: ارضرومون گه دیگینه واراندا، اوندا گؤردوم بوروم-بوروم قار گلیر. له له دئدی: گل بو یولدان قاییداق، دئدیم: دؤنمک ناموسوما آر گلیر. ازلدن ماییلام او آلا گؤزه، داراییب زولفونو تؤکوب گول اوزه، خوجالار یوک توتوب چیخدیلار دوزه، ائله بیلدیم کاروان ایله یار گلیر. کرمم، قوربته سالدیم یئریمی، ترک ائله دیم ناموسومو، آریمی، بوران، آلما الدن نازلی یاریمی، گئن دونیا باشیما یئنه دار گلیر. سؤز تامام اولدو. آما کی، چووغون، بوران گئتدیکجه آرتدی. دومان، قار هر

 طرفی ائله آلدی کی، ائله بیل گئجه اولدو. کرم آلدی، بو حالا موناسیب دئدی: 

ارضرومون گه دیگینه واراندا، اوندا دئدیم، قدیر مؤولام، آمان هئی! هر طرفدن چووغون، بوران، باد اثر، توتموش هر یانیمی چیسکین، دومان هئی!

بولبول قونار، ییرغالادار دالینی، اؤردک اوزر دالغالادار گؤلونو، خودام قیـرسین بدخاهلارین بئلینی، ایندن بئله گؤروشه یوخ گومان هئی! سو دوران یئرلری سونام گؤل ائیلر، چئشمیم یاشی گیریباندان سئل ائیلر، بزیرگانلار اوستوموزدن یول ائیلر، اوندا منیم حالیم اولار یامان هئی! ایگید گرک سر مئیداندا اوینادا، عشق آتشین سینه سینده قاینادا، هر کس اوچون اؤلوم هاقدی دونیادا، تاپیلمایا اوستلرینده جاهان هئی! کرم دئیر: عشق قازانین قاینادان، گئنیش اووالاردا کؤهلن اوینادان، فریاد ائدیب، چوخ آنالار آغلادان، من آغلاییم یانا-یانا، آمان هئی! کرم باخدی کی، داغ یول وئرمک ایستمیر. اؤلوم گلدی دوردو اونون گؤزونون قاباغیندا. دئدی: بو دونیادا اوچجه شئیدن قورخوم وار؛ بیر آیریلیق، بیر یوخسوللوق، بیر اؤلوم! هئچ بیریندن اصلا کؤنلوم شاد دئییل- بیر آیریلیق، بیر یوخسوللوق، بیر اؤلوم! باغریم باشین فلک نه چالدی داشا، یازیلانلار گلیر بو قریب باشا، حسرت قالدیم ائله، قوهوم-قارداشا. بیر آیریلیق، بیر یوخسوللوق، بیر اؤلوم!

چوخ سولئیمانلاری تاختدان ائندیردی، نئچه لرین گول رنگینی سولدوردو، نئچه لرین گلمز یولا گؤندردی. بیر آیریلیق، بیر یوخسوللوق، بیر اؤلوم! قریبین بویونا کفن بیچیلمز، اجل جامی چوخ آجیدی، ایچیلمز، اوچ دردیم وار بیر-بیریندن سئچیلمز- بیر آیریلیق، بیر یوخسوللوق، بیر اؤلوم! نئچه لرین قالاسینا اود آتدی، نئچه سینین آشینا زهریمار قاتدی، نئچه لرین جاوان ایکن قوجالتدی بیر آیریلیق، بیر یوخسوللوق، بیر اؤلوم! کرم یار یولوندا جانیندان کئچدی، قوربت ائلده اجل باده سین ایچدی، گول باغیندان بولبول قوربته اوچدو، بیر آیریلیق، بیر یوخسوللوق، بیر اؤلوم! باشلادیلار داغین دؤشو ایله یوخاری چیخماغا. بوران، چووغون داها دا برکیدی. صوفی باشلادی آغلاماغا. کرم اوندان خبر آلدی: - له له، نه اوچون آغلاییرسان؟ صوفی دئدی: - آغلاماییم نئیلگیم؟ اؤلوب بو داغدا قالاجاغیق، بدنیمیز قورد-قوشا یئم اولاجاق. گل قاییداق گئری. کرم دئدی: - له له، اؤلدو وار، دؤندو یوخدو. ایسته ییرسن سن قاییت، من تک گئدجیم. اؤلرم، اؤلرم، قالارام، قالارام. صوفی دئدی:

- من سنی تک هارا بوراخیم؟ ایندی کی، بئله اولدو یئری گئدک، گؤرک باشیمیزا نه گلیر. باشلادیلار داغا چیخماغا. یوخاریلاردا بوران داها دا شیددتلندی. صوفی کرمین سازینی آلیب دئدی:

ارضرومون گه دیگینه واراندا 

اوندا گؤردوم بوروم-بوروم قار گلیر. 

دئدیم: کرم، گل بو یولدان قاییداق، گؤردوم خان اوغلودو، اونا آر گلیر. دومان، چیسکین هر طرفی بورویوب، بدنیمده جیسمی-جانیم اریگیب، دئدیم: کرم، کیم بو یولدا یاریییب؟ گؤردوم کی، گئن دونیا جانا دار گلیر. من صوفییم، نئیله میشم، نئیلرم... درد الیندن قارا باغریم تئیلرم؛ لوغمان یوخدو، دردیم کیمه سؤیلرم؟ هاییف، ترلان اویلاغینا سار گلیر. صوفی ائله زور-گوج سؤزو قورتاریب ییخیلدی. کرم گؤردو کی، صوفی گئده بیلمیر. اونو قوجاغینا گؤتوروب، بیر تهر یالین باشینا چاتدیردی، بیر بالاجا قایانین دیبینده یئره قویدو، اوستونه خورجوندان-زاددان اؤرتدو، اؤزو ده دیلی توتولموش بیر حالدا بوزوشوب، بیر طرفده اوتوردو. بیردن قایانین اوستونده کیقار ییغیمی اوچوب، کرمین باشینا تؤکولدو. بیر تهر کی، قارین آلتیندان چیخدی، اوزون ارضروم داغلارینا توتوب دئدی: ارضرومون آلچاق-اوسا داغلاری، یاشیلباش سونالار اوچسون گؤلوندن. اغزیم آچیب سنه قارغیش ائیلرم، قبول اولسون هر نه چیخار دیلیمدن. دومان، چیسکین هئچ باشاجان گئتمه سین! اغیر ائللر اتگینی توتماسین!

یاز اولاندا گول-چیچگین بیتمه سین! هئچ گؤزللر اییله مه سین گولوندن! دوشمن اولدون، دوشمنلیگین بیلدیردین، بایس اولوب، سن صوفینی اؤلدوردون، کرم دئیر: گؤز یاشیمی سیلدیردین، اشدی قارا کئشیش(قاراملیک) قارلی بئلیندن. سؤز قورتاران کیمی، صوفی آیاغا قالخدی، دیزلرینه طاقت گلدی. کرمگیل دای هئچ بیلمه دیلر کی، قاردی، بوراندی، یا ندی. هئچ بیلمه دیلر هارایا گئدیرلر. ائله اوزلرینی بیر طرفه توتوب گئتمه یه باشلادیلار. تا کی، گئدیب-گئدیب، ارضروما چاتدیلار. بورادا دا هئچ بیر شئی اؤیرنه بیلمه ییب، دوشدولر یولون آغینا. ائله شهردن تزجه چیخمیشدیلار کی، یول قاباقلاریندا اوچله دی. قالدیلار مات-متتل، بیلمه دیلر بو یوللارین هانسی ایله گئتسینلر. کرم سازی دؤشونه باسیب بو حالا موناسیب گؤرک نه دئدی: ارضرومنان چیخدیم، اوچ اولدو یولوم، من بو یولون هانکیسینا گئدگیم؟ گئجه-گوندوز چاغیریرام یارادان، من بو یولون هانکیسینا گئدگیم؟ امان له له، نئجه اولدو حالیمیز، هاردا قالدی وطنیمیز، ائلیمیز، اؤردک اوچدو، ویران قالدی گؤلوموز، من بو یولون هانکیسینا گئدگیم؟ کرم چکر صفا مردی-مردانا، بیوفا الیندن گلمیشم جانا، بیر کیمسه یوخدو کی، یالوارام اونا، من بو یولون هانکیسینا گئدگیم؟ کرمگیل بورادا یول آختارماقدا اولسونلار، ائشیت اصلیدن. بیر آز اول دئدیک کی، کئشیش قئیصریده سولئیمان پاشانین یانینا گئدیب، باشینا گلنلرین اوستونه بیر آزدا یالاندان قونداریب، کرمی چوخ پیسله میشدی. سولئیمان پاشا دا کئشیشین دئدیکلرینه اینانیب، اونونلا دوستلاشمیشدی. هر یئره ده آدام قویموشدو کی، قئیصرییه کرم آدلی آشیق گلسه اونا خبر وئرسینلر. ایندی کئشیش بورادا یاشاماقدا اولسون، ائشیت قئیصری قیزلاریندان. یاز فصلی ایدی دئیین قئیصری قیزلاریندان بیر دسته سئیره چیخمیشدی. قیزلاردان بیری دئدی: - قیزلار، بورادا اصلی آدیندا قریب بیر قیز وار، گلین اونو دا اؤزوموزله اپاراق، یازیقدی. یولداشلاری راضی اولدولار. قیزلار اصلی خانین یانینا گلیب دئدیلر: - اصلی باجی، گل سن ده قوشول بیزه، سئیره چیخاق. اصلی قیزلارین کؤنلون سیندیرماق ایستمه دی. آما کی، قارا کئشیش(قاراملیک) باغچالاریندان باییرا چیخماغی اصلییه قاداغان ائلمیشدی. اودو کی، اصلی باشقا بیر یئره گئده بیلمه ییب، قیزلاردان خواهیش ائله دی کی، ائله اونلارین باغچالاریندا گزسینلر. قیزلار راضی اولدولار. ایندی قیزلار اصلیگیلین باغچالاریندا گزمکده اولسونلار، ائشیت کرمدن. کرم بیر مودت یول گئدیب، قئیصری شهرینه چاتدی. اوست-باشی ائله جیریم-

 جیندیر ایدی کی، هئچ بیلمیردی هارا گئتسین. یولو دوشدو اصلیگیلین همین باغچاسی نین  

یانیندان. گؤردو کی، بورادا بیر دسته قیز چالیب، اوخویوب، اویناییر. کرم کئچیب گئتمک ایسته ینده بیر ده گؤردو، بودو، باغچاداکی ائودن بیر قیز چیخیب، یوز ناز- قمزه ایله قیزلارا طرف گئدیر. دیقتله باخاندا اصلینی تانیدی. داها هئچ بیر سؤز دئیه بیلمه دی. سازینیز دؤشونه باسدی، گؤتوردو، گؤرک نه دئدی: ساللانا-ساللاما چیخدی خانادان، ای هزرات، گئدن جئیران منیمدی! قانا-قانا اؤیود آلیب آنادان، ای هزرات، گئدن جئیران منیمدی! من نه دئییم چارخی دؤنموش فله یه، اخیر سالی منی اولماز کله یه، اصلیم بنزر بئهیشتده کیمله یه، ای هزرات، گئدن جئیران منیمدی! گاه آغلادار، گاهدان منی گولدورر،

دسمال آلیب، گؤز یاشیمی سیلدیرر، کرم دئیر: بو درد منی اؤلدورر، ای هزرات، گئدن جئیران منیمدی! قیزلاردان بیری اونو گؤروب، قاچدی اصلینین یانینا کی: - اصلی باجی، بیر آشیق دایانیب باغچانین آغزیندا، ائله یانیقلی-یانیقلی اوخویور کی... اصلی دئدی: - چاغیر گلسین، بیر آز چالسین، اوخوسون، بلکه اورگیمیز آچیلا. قیز گئدیب کرمی گتیردی. کرم اصلییه تانیش گلدی. آما نه قدر باخدیسا انشیردا بیلمه دی. اونا گؤره آنشیردا بیلمه دی کی، کرمین اوزونو-گؤزونو توک باسمیشدی، ساچلاری اوزانیب چیینینه تؤکولموشدو. اؤزو ده ائله آریقلامیشدی کی، بیر دری قالمیشدی، بیر سوموک. اوستو-باشی دا لاپ تؤکولوب جیندیرلاشمیشدی. کرم باشا دوشموشدو کی، اصلی اونو تانییا بیلمیر. اودو کی، اونو بیر ده سیناماق اوچون آلدی، گؤرک نه دئدی: یئنه گؤردوم نازلی یارین اوزونو، کؤهنه دردین تزلندی یاراسی. نه لر چکدیم سئودیگیمین الیندن، بیلمم ندی مؤحنتیمین چاراسی؟ کتان کؤینک گئییب لاله دن نزیک، قونچا سؤور ائله ییر بولبوله یازیق. دردو قم چکیرم، اوزویم، اوزوک، قییما منه، آی صیغه ریم پاراسی. کرمم، قوربته دوشوبدو یولوم، داغلاری بورویوب یاغیشیم، دولوم، کؤنول کی، دؤنمه ییر، من نئجه دؤنوم؟ بنده سالیب باشلاری نین قاراسی. سؤز تاماما یئتدی. قیزلار کرمه آفرین سؤیله دیلر قیزلاردان بیری دئدی:

- بو یانشاق چوخ یارالی-یارالی اوخویور. دئیه سن، چوخ بؤیوک دردی وار. اؤزو ده دریب آداما اوخشاییر. اصلی سوروشدو: - آشیق، هارالیسان؟ کرم گؤردو یوخ، اصلی دوغرودان دا اونو تانییا بیلمیر. بیر آه چکیب دئدی: - قاراباغدانام. قاراباغ سؤزونو ائشیدن کیمی اصلینین گؤزلری یاشاردی. کرمین اوست-باشینا، اوز-گؤزونه باخیب، بیر اوووج پول چیخارتدی کی: - آشیق، من ده قاراباغدانام. آل بو پولو، اؤزونه پال-پالتار آل، بئله گزمه. اصلینین سؤزلری کرمه گولله کیمی دیدی. دئدی: خییات منه زری-زیبا بیچردی، ایندی چیلپاق قالدیم، اصلیم، گول منه!... بیر زامان داش-قاشنان اویناردی الیم، ایندی چیلپاق قالدیم، اصلیم، گول منه! یار الیندن دویونلویم، داغلییام، قوربت ائلده دردیم کیمه عاغلییام؟ عالم بیلیر من بیر خانین اوغلویام، باش اَیردی نؤکر، نایب، قول منه!

قورو یئرده اوریان قالدی بدنیم، من اؤلنده کیملر تیکر کفه نیم؟ کرم دئیر: یادا دوشدو وطنیم، بلد یوخدو، گؤستریدی یول منه!

اصلی دئدیگینه ده پئشیمان اولدو. اونون اورگین آلماق اوچون بیر گول قوپاریب دئدی: - آشیق، هئچ اولمازسا، بو گولو آل مندن. کرم دئدی: - خانیم، قولاق آس، گؤر نه دئییرم؟ الدی کرم:

من یازیغی آغلار قویان بیوفا، اغلایان کیمسه یه گول نه یه لازیم؟ گوله-گوله ییخدین آتام ائوینی، دوشمنلیکده شیرین دیل نه یه لازیم؟

اصلی خان کرمین سؤزونو کسیب دئدی: - آشیق، سن قریب اولدوغون کیمی، من ده غریبه م. وطنده منیم ده گؤزو یاشلی بیر معشوقوم قالیب. سؤزوم اوندا دئییل. بورا یانشاقلاری نین گئییمی باشقا جور اولور. سن گل بو پولو مندن آل! ایندی کی، پالتار ایستمیرسن، یولدا خرجلرسن. کرم آلدی سؤزون او بیری بندینی: هسرتیندن یاندیم، یاندیم کول اولدوم، الیشدیم، آلیشدیم، موما دیل اولدوم، خان اوغلویدوم، اؤزوم دؤندوم قول اولدوم، قول اولان کیمسه یه قول نه یه لازیم؟ کرمین عؤمرونو سن وئردین زایا، مونکور اولدون، اوز توتمادین خودایا، اولدوم خاراباتی، دوشدوم سهرایا، خارابات اهلینه یول نه یه لازیم؟ اصلی کرمی تانیدی. اورگی تاب گتیرمه دی، ییخیلیب اؤزوندن گئتدی. قیزلار کرمی قوووب، باغدان چیخارتدیلار کی، سن بیزیم قریب قوناغا نه دئدین کی، او بئله اولدو. سونرا توپلاشدیلار اصلینین یانینا. اصلی آییلان کیمی قیزلاردان سوروشدو: - قیزلار، یانشاق نئجه اولدو؟ دئدیلر: - قوودوق، گئتدی. اصلی دوروب او طرف-بو طرفه بویلاندیم، گؤردو کرم بیر آز آرالی دایانیب، هسرت-هسرت اونا باخیر. قیزلار دا کرمی گؤردولر، ایسته دیلر سؤیوب-یامانلاییب قووالاسینلار، اصلی قویمادی. دوردو کی: - من ائوه گئدیرم. قیزلار دوشدولر اونون یانینا.

ایندی اونلار گلیب کئچمکده اولسونلار، سنه دئییم کرمدن. اصلی کی، اؤزوندن گئتمیشدی، قیزلار اونون دؤشونو-باشینی آچمیشدیلار. ایندی گلیب کئچنده کرم سازینی آلیب، گؤرک اصلییه نئجه ایشاره ائله دی کی، دؤشونو باغلاسین. ساللانیبان گلن دیلبر، یاخان دویمله، دویمله!.. منی درده سالان دیلبر، یاخان دویمله، دویمله!.. کرم بئله اوخویاندا اصلی خان قاییدیب قیزلارا دئدی: - یانشاق طایفاسی سؤزسول اولور. باخین، سیزلردن کیمین دؤشو آچیقدی؟ قیزلار دئدیلر: - بیزلردن دؤشو آچیق اولان یوخدو. کرم بو دفعهایشاره نی وورماق اوچون اصلی خانین پالتاری نین آدینی چکدی، بلکه اصلی باشا دوشه کی، آچیق دؤش اونونکودو: ال گئییب، یاشیل بورونر،

 زولفلری یانا هؤرولر، 

یئل وورار، ممن گؤرونر، یاخان دویمله، دویمله!.. یاخان چارپاز ایلیشمه سین، هئچ کیم دینیب دانیشماسین، یادلار گؤروب گولوشمه سین، یاخان دویمله، دویمله!.. اصلی یئنه دؤشونون آچیق اولدوغونو باشا دوشمه دی. کرم بو دفعهگؤرک اصلی خانا نه کیمی ایشاره لر ائله دی: کؤینگی نین گولو یاشیل، سوسن سونبوله دولاشیر، گؤزللیک سنه یاراشیر، یاخان دویمله، دویمله!..

اینینه گئیینیب شیله، بیزی توتوب شیرین دیله،

 زر کمر چک اینجه بئله،  

یاخان دویمله، دویمله!.. کالایاغین اوجو ساری، اچیلیر کؤنلوم قوباری، سؤیله گؤروم کیمین یاری، یاخان دویمله، دویمله!.. اصلی یئنه ده بیر شئی باشا دوشمه ینده کرم آلیب، آخیر سؤزونو نئجه تاماملادی: کرم سنه نه لر دئمیش، دیلین، دوداغینی یئمیش، کتان کؤینک، بندی گوموش، یاخان دویمله، دویمله!.. کرم بونو دئینده اصلی اوست-باشینا باخیب گؤردو کی، کرمین دئدیگی نیشانلار بوندادی. یاخاسی دا آچیقدی. تئز دؤشونو دویمله دی، کرمه گیزلی ایشاره وئریب، یولادوزلدی.

کرم او ساعات اؤزونو بازارا وئردی، بیر دست فاخیر لیباس آلیب گئییندی، بیر باش اصلینین باغچاسینا گئتدی. اصلینین آناسی کرمی گؤردو، دئدی: - آی اوغلان، کیمی ایسته ییرسن؟ کرم دئدی: - آنا، دیشیم آغریییر. دیشیمی چکدیرمک ایسته ییرم. ارواد دئدی: - گل بری چکیم. کرم ائوه گیریب اوتوردو. آرواد اونون آغزینی آچیب دئدی: - هانسی دیشین آغریییر؟ کرم دئدی: - آزی دیشیم.

ارواد کلبتینی اونون آغزینا سالدی، چکمک ایسته ینده کرم ترپندی. ارواد اصلینی چاغیریب دئدی: - قیزیم، بو اوغلان کلبتی نین آلتیندا فاراغات دورا بیلمیر. گل، بونون باشینی دیزینین اوستونه قوی، قریبدی، یازیقدی، دیشینی چکیم. اصلی کرمی تانیدی. آما قورخوسوندان دینه بیلمه دی. یاواشجا کرمین باشینی آلیب سینه سینه دایادی. کئشیشین آروادی کرمین آزی دیشینی چکدی. کرم دئدی: - وای، صاف دیشیمی چکمیسن. آغرییان او بیری دیشیمدی. ارواد او بیری دیشینی ده چکدی. اصلی داوام گتیره بیلمه ییب، آغلاماغا باشلادی. ارواد سوروشدو: - قیزیم، بو نه ایشدی؟ من بو اوغلانین دیشینی چکیرم، سن نییه آغلاییرسان؟ اصلی دئدی: - قریب اوغلاندی، یازیغیم گلیر. کرم دئدی: - آرواد، سن یئنه ده صاف دیشیمی چکمیسن. آغرییان او بیری دیشیمدی. بئله-بئله، آرواد کرمین اوتوز ایکی دیشینی تامام چکدی. کرم یئریندن قالخدی. آما ائله قالخدی کی، ائله بیل هئچ دیشی چکیلمه میشدی. ارواد کرمین اصلییه چوخ حصرتنن باخماغیندان شوبهله نیب، ایشاره ائله دی کی، کئچسین او بیری اوتاغا. اصلی چار-ناچار اوزونو چئویریب گئتمک ایسته ینده، کرم سازی باسدی دؤشونه، دئدی:

اؤلدوم، اؤلدوم، اصلی، سنین الیندن، یاندی سینم، بیر ده گؤستر یارا اوز. همیشه اوستونده تیترردی جانیم، سینه دردلی، کؤنول دردلی، یارا اوز.

باش قویوم دیزینه، بلکه ساغالام، ساغ قولوملا یار یولوندا ساغ اولام، چتین، چتین بو یارادان ساغالام، هیجران تکدی، دردیم تکدی، یارا یوز. دردلی کرم دئیر: قوربان یار اوچون، کس سییریم، دوغرا باغریم، یار ایچیم، یار اودو کی، یار یولوندا، یار اوچون درد-قم چکه، یاش آخیدا، یارا اوز.

سؤز تاماما یئتن کیمی اصلی خانین آناسی کرمی تانیییب، برکدن قیشقیردی کی: - اوی، آمان، بو کرم ایمیش!.. ارواد کرمین دیشلرینی ده گؤتوروب، باشی آلوولو کئشیشین یانینا خبره گئتمکده اولسون، اوتاقدا اصلی ایله کرم تک قالدیلار. کرم بیر تهر آغزی نین قانینی تمیزله ییب، اصلییه طرف گلدی. ایکی عاشیق، معشوق بیر-بیری نین بوینونا ساریلدیلار. اما اصلی بیلیردی کی، آناسی خبره گئدیب، ایندی هارادا اولسا آتاسینی تاپیب گتیرسک. اودو کی، ساچیندان ایکی تئل آییریب، سینه سینه باسدی، آلدی، گؤرک نه دئدی: یئنه دوشدوم آتشینه، یانارام، یاندیم، کرم، منی روسوای ائیله مه! منی سالدین سن بو عشقین اودونا، یاندیم، کرم، منی روسوای ائیله مه! الدی کرم، دئدی: بیزیم ائلدن سورا-سورا گلمیشم، نه لر چکدیم، اصلی، سنین الیننن؟! درین-درین دریالارا قالمیشام، نه لر چکدیم، اصلی، سنین الیننن؟! الدی اصلی: اوغرون-اوغرون دوست باغینا گیرمه دیم، ال اوزادیب، قونچا گولون درمه دیم، ایریلالی بیرجه دفعهگولمه دیم، یاندیم، کرم، منی روسوای ائیله مه! الدی کرم: اخیتمیشام گؤزلریمنن یاشیمی، قوربت ائله سالدیم قریب باشیمی،

انان چکدی اوتوز ایکی دیشیمی، نه لر چکدیم، اصلی، سنین الیننن؟! الدی اصلی: قووا-قووا قریب ائله گتیردین، بیر اولان دردیمی یوزه یئتیردین، نه من اؤلدوم، نه ده سن ال گؤتوردون، یاندیم، کرم، منی روسوای ائیله مه! الدی کرم: دوشدوم داغا، داشا، چؤله، سهرایا، بو سریمی سالدین اولماز سئودایا، محشر گونو سؤزوم واردی مؤولایا نه لر چکدیم، اصلی، سنین الیننن؟! الدی اصلی: امان، کرم، پاشام کرم، خان کرم! الیش، کرم، توتوش، کرم، یان، کرم! اصلین اولسون سنه قوربان، سان کرم! یاندیم، کرم، منی روسوای ائیله مه! الدی کرم: بیلمیرم من بو ساغلیغی نئیله یهم؟ خنجر آلیب باغریم باشین تئیله یهم. درد الیننن بو سؤزلری سؤیله یهم، نه لر چکدیم، اصلی، سنین الیننن؟! الدی اصلی:

نئچه ایلدی من گزیرم داغلاری، بو سینمه چکدین یامان داغلاری، اصلی سنه کرم دئییب یالواری، امان، کرم، منی روسوای ائیله مه!

کرم دئیر: دوست باغینا گیرمه دیم، ال اوزادیب قونچا گولون درمه دیم، من یاریمدان هئچ بیر وفا گؤرمه دیم، نه لر چکدیم، اصلی، سنین الیننن؟!

سؤز تامام اولدو، اصلی دئدی: - کرم، آتام سنی سولئیمان پاشایا برک چوغوللاییب. ایر او ایندی سنین بورادا اولدوغونو بیلسه، یقیندی کی، توتوب زیندانا سالدیراجاق. آما سن قورخما. من بیر کاغیذ یازیم وئریم سنه، آپار وئر سولئیمان پاشایا. اؤز دردینی آچ، دیلنن ده اونا دئ. بلکه پاشا رحمه گلیب، منی آتامدان آلیب، سنه وئره. کرم اوشاق کیمی آغلاماغا باشلادی. اصلی کرمین آغلاماغینا صبر ائله یه بیلمه ییب دئدی:

اغلاما، آغلاما، باغریم قان اولو، قوی قوشوم یانینا قوللاری، کرم! بیر عریضه یازیم سولئیمان خانا، اؤزون دانیش دردی-دیللری، کرم!

نه قدر آتام وار، من اونا پسم، ایلقاریمنان دؤنسم کسسین کیلیسم، دئمه کی، غریبه م، من ده بیکسم، چیخارت خیالیندان اونلاری، کرم!

اصلی دئیر: کرم قوووه لی، سانلی، اؤلونجه آتاملا اولاجام قانلی، ایسته سن آتلانسین عجم، عوثمانلی، ویرانا قویارام یوللاری، کرم!