حلواي حريت

نولور شيرين ميذاق ائتسه مني حلوايي حوررييت
يئسه م بير لوقمه اوندان، سؤيله سم اوخقاي حوررييت!

دئه، خئير اولسون، يوخو گؤردوم كي بير دريا كناريندا
تؤكوبلر يان با يان، قات- قات، بوتون پاي- پاي حوررييت!

ييغيب دا دولدورورلار كيسه- كيسه باغلانيب مؤحكم
اوروللر تلله، داغدان دا آشيب بالا-يى حوررييت!

زئبس چوخدان بري شووقوندا ايديم من بو حلوانين
دئديم، ياران، نولور وئرمز منه بير پاي، حوررييت!

سؤزوم خوش گلمه ييب تحويلداره، سؤيله دي: "گم شو!"
" بدست كوته از نخل مجو خرماي حريت! "

" همي داني كه اين دلبر، بو گون مخصوص ايران است "
" تو خود نامحرمي بر شاهد زيباي حريت! "

كمال-ى ياس ايله محروم اولوب بير ياندا اَيلشديم
آليب بير كشتىيه دولدوردولار تاي- تاي حوررييت!

سويستك قيشقيريب، كشتي روان اولدو، باخيرديم من
هله گئتمك ده ايدي زؤورق-ى دريا-يى حوررييت!

كي ناگه بير قارا بايراق آچيلدي در آغاجيندا
يازيلميش اوندا بير خطط-ى موصيبت زاي حوررييت!

اوخوركن خططي معلوم اولدو كشتيبان غرق اولموش
قاليب درياده حئيران كشتي-يى دعوا-يي حوررييت!

خوروشان موجلر هر سمتدن يئكسر هوجوم آور
گؤروب امواجي كشتيبان اوجالدي: واي، حوررييت!

بو سسدن سكسه نيب دوردوم، گؤتوردوم ساعته باخديم
هله گؤردوم كي شبدير، سؤيله ديم: لاي- لاي حوررييت!

ميرزا علي اكبر صابير

**********************************************

ستارخان

حال-ى مجذوبوم گؤروب، قارئ، دئمه ديوانه دير
نعره-يي شوريده مي ظنن ائتمه بير افسانه دير
شاعيرم، طبعيم دنيز، شئعر-ى تريم دوردانه دير
بئهجتيم، عئشقيم، سوروروم، وجديم احرارانه دير

اينجيذابيم جورات-ى مردانه-يي مردانه دير
آفرينيم هيممت-ى والا-يي ستتارخانه دير

تا کي ميللت مجمعين تئهراندا ويران ائتديلر
تورکلر ستتارخانىيله عهد-و پئيمان ائتديلر
ظولم-و ايستيبداده قارشي نيفرت ائعلان ائتديلر
ميللته، ميللييته جان نقدي قوربان ائتديلر

آيه-يي ((ذبح عظيم)) ايطلاقي اول قوربانه دير
آفرينيم هيممت-ى والا-يي ستتارخانه دير

حق مددکار اولدو آذربايجان اتراکينه
آل-ى قاجارين ((پروتئست)) ائتديلر ضححاکينه
اول شهيدانين سلام اولسون روان-ى پاکينه
کيم تؤکولموش قانلاري تبريز-و تئهران خاکينه
اونلارين جننت دئييلدير منزلي، آيا نه دير؟
آفرينيم هيممت-ى والا-يي ستتارخانه دير

ايشته ستتارخان! باخيز بير نؤوعي ايقدامات ائديب
بير وزير-و شاهي يوخ! دونياني يئکسر مات ائديب
عيرض-ى ايسلامي، وطن ناموسونو يوز قات ائديب
حورمت-ى حئيثييت-ى ميللتين ايثبات ائديب

ايندي دونيانين توججوه نوقطه سي ايرانه دير
آفرينيم هيممت-ى والا-يي ستتارخانه دير

ايشته ستتارخان! ايراني ائحيا ائيله دي
تورکلوک، ايرانلىليق تکليفين ايفا ائيله دي
بير رشادت، بير هونر گوستردي، دعوا ائيله دي
دؤولتين بير عينىني دونياده روسوا ائيله دي

قاچماييب پروانه تک اوددان، دئمه پروانه دير
آفرينيم هيممت-ى والا-يي ستتارخانه دير

آفرين تبريزييان، ائتديز عجب عهد-و وفا
دوست-و دوشمن ال چاليب، ائيله ر سيزه صد مرحبا
چوخ ياشا دؤولتلي ستتارخان! افنديم، چوخ ياشا
جننت-ى اعلاده پئيغمبر سيزه ائيله ر دوعا

چون بو خيدمتلر بوتون ايسلامه دير، اينسانه دير
آفرينيم هيممت-ى والا-يي ستتارخانه دير

صابير

**********************************************

قويمايين

سس اوجالاشدي، قويمايين
ميللت اوياشدي، قويمايين
ريشته-‌يي درسه، مكتبه
جومله دولاشدي، قويمايين
ايش ياوالاشدي، قويمايين

ائل اويوشوب آزانلارا
گونده قازئت يازانلارا
اود وورولوب قازانلارا
قاينادي، داشدي، قويمايين
حدددن آشدي، قويمايين


ترك ائيله‌يك جوانلاري
ذرره‌جه يوخدو قانلاري
سؤزلري دوغرو ايسه ‌ده
باشلاري ساشدي، قويمايين
چؤهره تراشدي، قويمايين

سئحري، فيسونو خوشلايين
شاعيري، شئعري بوشلايين
مكتب ايله بو فيرقه نين
باغري باداشدي، قويمايين
قارقا دولاشدي، قويمايين
چوخ پيس اولاشدي، قويمايين


كافير اولوب وورون، وورون !
ريشته-‌يي اولفتين قيرين
يازديغي شئعريني جيرين
دينه ساتاشدي، قويمايين
كوفره بولاشدي، قويمايين

عاغلي، شوعورو، فهمي يوخ
عيرض-و حياده سهمي يوخ
مذهبي، ديني، رحمي يوخ
ايشلري ياشدي، قويمايين
لاپ دانا باشدي، قويمايين
قيريلدي، قاشدي، قويمايين
گؤزدن اوزاشدي، قويمايين

**********************************************

اول وقت کي مشروطه خبري ايران کندليلرينين قولاغينا يئتيشدي، بير نفر قوجا اکينچي سجده يه
ييخيليب دئدي:

صد شوکر کي اولدو نورباران
مشروطه ايله بو خاک-ى ايران

رخنه يئتيشيب بنا-يي ظولمه
يئر قالمادي کدخودا-يي ظولمه

ظولمون، سيتمين چيراغي سؤندو
ايران يئنه بير بئهئشته دؤندو

حاکيملرين ايختيياري بيتدي
دئهقانلارين ايضطيرابي بيتدي

بوندان سونرا رنجبر دؤيولمز
ناحق يئره بينوا سؤيولمز

سالماز بيزي مولکدار رنجه
قورماز بيزه بير داها شيکنجه

يازيق بو شئعرلري اوخور- اوخوماز ناگاه ديوان مامورلاريندان بير نفر فرراش حاضير اولوب اکينچينين قوللاريني باغلاييب، آت قاباغيندا پيياده اونو اربابين قاپيسينا گتيردي.

اربابين گؤزلري قيزارميش، الينده بي تعليمي ديشرا چيخيب اکينچيني گؤردوکده دئدي:

ها... اکينچي بير آي کئچير کي خرمن
اؤتدو نره لرده قالميسان سن؟!

محصولو بوتون اؤزون گؤتوردون
اربابه نه پيشکئش گتيردين؟!

بوستاندا کي ميوه جاتي دردين
آيا دئه گؤرک بيزه نه وئردين؟

بو باغدا نه آرپا چاتدي سندن
نه لوبيا، نوخود، نه پاخلا، ارزن

لازيم سنه ايندي مين عوقوبت
تا عيبرت آلا بوتون بو رعيت

بيچاره اکينچي بوينو چيينينده، بوتون بدني اسه- اسه، قورخا- قورخا باش انديريب عرض ائتدي

آللاهه قسم کي من فقيرم
کوچ، کلفت الينده دستگيرم

اطفال-ى صغيره پاسبانم
آواره-يي اکل-و شرب-و نانم

معلوم-ى جنابينيزدير ارباب!
بير ايل قوراق اولدو، تاپماديق آب

اکديکلريمين تمامي ياندي
فريادلريم گؤيه داياندي

واللاه اؤزوموز ده قالميشيق آج
بير پارچا قورو لواشه مؤحتاج

ارباب بو سؤزلري اکينچيدن ائشيتديکجه آغزي کؤپروموش، گؤزلري حدقه دن چيخميش بير حالتده: اوشاقلار، فلقه، چوبوق حاضير ائدين! اود يانديرين، شيش قيزديرين دئدي. بو اثناده دؤرد نفر ظاليم اللرينده شاللاق بيچاره اکينچينين آياقلاريني مؤحکم باغلاييب فلقه يه ساليب دؤيمه يه باشلاديلار:

ارباب- وور، وور کي گتيرمه ييبدير آرپا
اکينچي- اينسان دؤزه نمز بو شارپا- شارپا!

ارباب- وور، وور کي بير آز دا مست-ى کامم
اکينچي- جانيم چيخار، وورما، بىدوامم

ارباب- وور، وور کي نه ياغ وئريب، نه قايماق
اکينچي- وورما، دئييل اينکلريم ساغ

ارباب- وور، وور کي بونو قودورتدو مجليس!
اکينچي- وورما، مني حاکيم ائتدي موفليس!

ارباب- مشروطه بونو خراب ائديبدير!
اکينچي- ظولمون مني ديل کاباب ائديبدير!

ارباب- حوررييت ائديب بو شومو گومراه!
اکينچي- فرياده يئتيش، آماندير آللاه!

...

صابير

**********************************************

ملا نصرالدينين يورغاني

گئجه ياتماق زاماني چاتميش ايدي
مولانصرالدين ائوده ياتميش ايدي

ناگهان كوچه دن اوجالدي صدا
وور هاراي دوشدو، قوپدو بير غووغا

موللا چيينينده يورغاني، درحال
كوچه يه چيخدي، موضطريب احوال

گؤردو بير ياندا بير آغير دسته
سانكي مينميش آداملار اوست اوسته

ايسته دي دسته يه طرف گئتسين
بو ييغينجاق نه دير؟ سوآل ائتسين

ايشبو اثناده بير نفر طررار
يورغاني قاپدي ناگه، ائتدي فرار

موللا بو قيصصه دن پريشان حال
ائوينه دؤنجه ك، عوورت ائتدي سوآل

دئ گؤروم كوچه ده نه وار، آ كيشي
بو نه دعوادير، آنلادينمي ايشي؟

دئدي يورغان اوچون ايميش بو تلاش
يورغاني قاپديلار، كسيلدي ساواش

**********************************************

اولورموش!

مشروطه چيلر مجبورن حاجي ميرزا حسن ايمام جومعه ني ايخراج-ى بلد ائتديکلرينده ايمام جومعه نين زبان-ى حالي:

من بيلمز ايديم بختده بو نکبت اولورموش
عيززت دؤنوب آخير بئله بير ذيللت اولورموش
چرخين عجبا سئيري ده مين بابت اولورموش
ميللت آييليب طاليب-ى حوررييت اولورموش
ميللتده ده ياهو! بئله بير غئيرت اولورموش

يالقيز نه دئييم، گئتدي منيم ميللت اليمدن
توپراق باشيما! چيخدي بوتون عيززت اليمدن

تبريزده گر اولموش ايديم جومعه ايمامي
گيزلين کي دئييل، ياخشي بيلير مطلبي هامي
پول ايله ساتين آلميش ايديم من بو مقامى
اويدورموشودوم کنديمه بيلجومله عوامي
عبد ائتميش ايديم شهرده هر پوخته ني، خامي

خود من نه بيليم صوبح دؤنوب شام اولاجاقميش
ايراندا دا حوررييت-ى ايسلام اولاجاقميش

تدريجله سالميشديم اله، بونجا دئهاتي
بير پارچا چؤره ک نؤکري ائتميشديم ائلاتي
آرتميش ايديم مزرعه ني، ايلخيني، آتي
رنجبر ائيله ميشديم اؤزومه چوللونو، تاتي
درکار ايدي خئيريمده عومومون حرکاتي

بيردن بيره گئتدي هامي کرر-و فريم، ائي واي
چيخدي بوشا ثروت قازانان اللريم، ائي واي

تبريزده راحت يئييب آسوده دويارديم
مؤمينلري هر تؤهمته اولسايدي قويارديم
هر آخماغي، خامي قوزو جيلدينده سويارديم
حق سوز دئيه نين جانين آليب، چشمين اويارديم
نئيله رديم ائله رديم، نئجه رنگ اولسا، بويارديم

صد حئيف گؤزه ل حؤکم-ى شريعت تلف اولدو
قانون-ى اساسي دا بير انگل کلف اولدو

بيلمه م آريلار منزيلينه کيم چؤپ اوزاتدي
ايللرجه تغافولده ياتان خالقي اوياتدي
فيتنه آغاجين اکدي، حؤکومت ياسا باتدي
من هر چى چاليشديم کي کسه م، قول- بوداغ آتدي
اهل-ي غرض اؤز ايسته دييي مطلبه چاتدي

احکام-ى شريعت داهي بير کار گؤره ر مي؟
بوندان سورا بير بوغداني انبار گؤره ر مي؟

لال اولسا نولار ميرزا جاوادين ديلي، اي کاش
تا آغزين آچيب ائيله دي هر گيزلي سؤزو فاش
بير ياندا ييغيب ميرزا حوسئين باشينا يولداش
جيغ- ميغ ائديب آخير باشيما سالديلار بير داش
تبريزده تا اولدو برانگيخته، پرخاش

ايندي حسب الخواهش-ى اهل-ى حسد اولدوم
بير دادرسيم اولمادي، خاريج بلد اولدوم

ديوانه ائديبدير مني تبريز خيالي
مجليسده تواضؤعده کي نيم خيز خيالي
مطبخ اييي، سوفره غمي، دهليز خيالي
صدري دويونون بوي-ى فرح بيز خيالي
قند آب ايله پور، کاسه-يي لبريز خيالي

بير ده او گؤزه ل گونلري يارب، گؤره رم من؟
بو خام خيالي ائديب آخير اؤله رم من

يارب نولا بير ده ائده م اول شهري زييارت
نازيله خورامه گله م، آرخامدا جماعت
گؤردوکده مني يول وئره بو اهل-ى ويلايت
تعظيم ائده، باش يئنديره، قول باغلايا ميللت
بير کيمسه ده بير سؤز دئمه يه اولمايا جورات

اعيانلاري دينديرسه م ائده فخر-و موباهات
هئيهات و هئيهات و هئيهات و هئيهات
گئت يات و گئت يات و گئت يات و گئت يات


صابير